جدید بھارت نیوز سروس
پلاموں،3؍اپریل: پولیس اور مجرموں کے درمیان مسلح مڈبھیڑ ہوا ہے، جس میں بدنام زمانہ مجرم فیض خان کے پیر میں گولی لگی ہے۔ یہ مڈبھیڑ پلاموں کے پانکی اور ترحسی کے سرحدی علاقے میں پیش آیا۔درحقیقت، جمعرات کی رات پلاموں کے پرائیویٹ بس اسٹینڈ کے قریب شتابدی مارکیٹ میں گڈو خلیفہ عرف سمیر خلیفہ کو گولی مار کر قتل کر دیا گیا تھا۔ اس معاملے میں بدنام زمانہ مجرم فیض خان اور اس کے ساتھیوں کے خلاف نامزد ایف آئی آر درج کی گئی تھی۔ پولیس فیض خان کی گرفتاری کے لیے چھاپہ ماری کر رہی تھی۔اسی دوران پلاموں پولیس کو اطلاع ملی تھی کہ فیض پانکی اور ترحسی کے علاقے میں چھپا ہوا ہے۔ اس اطلاع کی بنیاد پر پولیس نے سرچ آپریشن شروع کیا۔ چھاپہ ماری کے دوران فیض خان کی طرف سے فائرنگ کی گئی، جس کے جواب میں پولیس نے بھی گولیاں چلائیں۔ اس فائرنگ میں فیض خان کے پیر میں گولی لگی ہے۔ پولیس نے جائے وقوعہ سے ایک اور مجرم کو بھی گرفتار کیا ہے، جبکہ فیض خان کو علاج کے لیے اسپتال میں داخل کرایا گیا ہے۔
ایس پی کا بیان
ایس پی ریشما رمیشن نے بتایا کہ “چھاپہ ماری مہم کے دوران یہ مقابلہ ہوا ہے، جس میں ایک مجرم کے پیر میں گولی لگی ہے۔ پولیس اس معاملے میں مزید تحقیقات کر رہی ہے”۔
جے ایم ایم لیڈر کے قتل سمیت کئی وارداتوں کا ملزم ہے فیض خان
فیض خان پلامو میں کئی سنگین مجرمانہ وارداتوں کا ملزم رہا ہے۔ 2012 میں جھارکھنڈ مکتی مورچہ (JMM) کے اقلیتی مورچہ کے ضلعی صدر لڈو خان کے قتل کا وہ مرکزی ملزم ہے۔ اس کے علاوہ وہ کئی دیگر قتل کے مقدمات میں بھی ملوث ہے۔ پولیس نے اس قتل کیس کے سلسلے میں کئی دیگر افراد کو بھی حراست میں لیا ہے جن سے پوچھ گچھ جاری ہے۔
پلاموں میں پولیس اور مجرموں کے درمیان خونریز مڈبھیڑ : بدنام زمانہ فیض خان کے پیر میں لگی گولی
