ہوائی سفر ہوا مہنگا، رانچی کی ٹرینوں میں مسافروں کا ریکارڈ اضافہ

جدید بھارت نیوز سروس
رانچی،7؍دسمبر:: ہوائی سفر کے مہنگا ہونے کا براہِ راست اثر اب رانچی ریلوے ڈویژن کی ٹرینوں میں صاف دکھائی دینے لگا ہے۔ حالیہ مہینوں میں ہوائی کرایوں میں مسلسل اضافہ ہونے کی وجہ سے لمبی دوری کے مسافروں نے دوبارہ ٹرین کو اپنی پہلی ترجیح بنانا شروع کر دیا ہے۔ اس کا نتیجہ یہ ہے کہ رانچی سے چلنے والی اہم ٹرینوں میں مسافروں کی تعداد تیزی سے بڑھ گئی ہے اور نشستیں پہلے کے مقابلے بہت جلد بھرنے لگی ہیں۔خاص طور پر تہواروں، چھٹیوں اور پیک سیزن میں زیادہ تر ٹرینوں میں ویٹنگ لسٹ بہت لمبی ہوجاتی ہے، جس سے کنفرم ٹکٹ حاصل کرنا مسافروں کے لیے ایک بڑا چیلنج بن گیا ہے۔ یہی صورتحال اس وقت رانچی ریلوے ڈویژن کی ٹکٹ بکنگ میں دیکھنے کو مل رہی ہے۔ ان دنوں ٹکٹوں کے لیے زبردست ہڑبونگ مچی ہوئی ہے کیونکہ لوگوں کو ٹکٹ مل ہی نہیں رہی اور تقریباً تمام ٹرینیں پوری طرح بھری چل رہی ہیں۔
اہم روٹس پر دباؤ بڑھتا جا رہا ہے
ریلوے ڈویژن کے افسروں کے مطابق راجدھانی ایکسپریس، جن شتابدی، ہٹیا۔ہوڑہ، رانچی۔دہلی، رانچی۔ممبئی سمیت جنوبی ہند جانے والی ٹرینوں میں بھی بھاری بھیڑ دیکھی جا رہی ہے۔ کئی اہم راستوں پر مسافروں کا دباؤ لگاتار بڑھ رہا ہے۔ پہلے جہاں سفر کا منصوبہ چند دن پہلے بنا کر آسانی سے ٹکٹ مل جاتا تھا، وہیں اب ٹکٹ بکنگ کے لیے مسافروں کو ایک ہفتہ پہلے سے تیاری کرنی پڑ رہی ہے۔ ہوائی کرایہ بڑھنے سے سفر کا مجموعی خرچ بڑھ گیا ہے، اسی وجہ سے بڑی تعداد میں مسافر ریلوے کو ایک سستا، محفوظ اور قابلِ اعتماد ذریعہ سمجھ کر اسے ترجیح دے رہے ہیں۔
ہوائی کرایہ بڑھنے کے بعد ریل ہی واحد بہتر متبادل: مسافر
رانچی۔دہلی، رانچی۔پٹنہ اور رانچی۔ہوڑہ جیسے مصروف روٹس پر بھیڑ اس قدر بڑھ گئی ہے کہ کئی بار ٹرینیں اپنی پوری گنجائش سے بھی زیادہ بک ہو جاتی ہیں۔ مسافروں کا کہنا ہے کہ ہوائی سفر کا خرچ بڑھنے کے بعد ٹرین ہی سب سے بہتر متبادل بچ جاتا ہے، لیکن ویٹنگ لسٹ بڑھنے سے ان کے سفر کے منصوبے متاثر ہو رہے ہیں۔ بہت سے مسافروں کو تتکال ٹکٹ کے لیے گھنٹوں انتظار کرنا پڑتا ہے اور کئی بار آخری وقت تک بھی ٹکٹ کنفرم نہیں ہو پاتا۔مسافروں کی اس بڑھتی ہوئی تعداد کو دیکھتے ہوئے یہ امکان ظاہر کیا جا رہا ہے کہ ریلوے مستقبل میں کچھ اہم روٹس پر اضافی ٹرینیں چلانے یا نئی سروس شروع کرنے پر غور کر سکتا ہے۔ افسروں کے مطابق ٹرینیں بڑھانے کا فیصلہ ریلوے بورڈ کی سطح پر ہوتا ہے، لیکن مقامی سطح پر بڑھتی ہوئی مانگ اب واضح طور پر دکھائی دے رہی ہے۔ تہواروں کے دوران خصوصی ٹرینیں بڑھانے پر بھی محکمہ سنجیدگی سے غور کرتا ہے تاکہ مسافروں کو زیادہ سہولت مل سکے۔ ہوائی سفر مہنگا ہونے کے سبب رانچی ریلوے ڈویژن پر مسافروں کا دباؤ مسلسل بڑھتا جا رہا ہے۔