وزیر اعلیٰ ہیمنت کا مرکزی وزیر مملکت کوئلہ ستیش چندر دوبے سے مطالبہ
جدید بھارت نیوز سروس
رانچی، 26 اگست:۔جھارکھنڈ کے وزیر اعلیٰ ہیمنت سورین نے منگل کو جھارکھنڈ قانون ساز اسمبلی میں وزیر اعلیٰ کے چیمبر میں کوئلہ کے مرکزی وزیر مملکت ستیش چندر دوبے کے ساتھ ایک اعلیٰ سطحی میٹنگ کی۔ جس میں کوئلے کی کان کنی کی سرگرمیوں، ماحولیاتی توازن، مقامی لوگوں کو روزگار کی فراہمی اور علاقائی ترقی سے متعلق مختلف امور پر تفصیلی تبادلہ خیال کیا گیا۔ اس موقع پر وزیر اعلیٰ نے جھارکھنڈ کے مفادات، کان کنی کے علاقوں میں مقامی لوگوں کی شرکت، روزگار پیدا کرنے، ماحولیاتی توازن اور ریاستی حکومت کو حاصل ہونے والی آمدنی سے متعلق مسائل کو اہمیت دی۔ وزیر اعلیٰ ہیمنت سورین نے واضح طور پر کہا کہ کان کنی کا کام مکمل ہونے کے بعد حکومت ہند کو زمین ریاستی حکومت کو واپس کر دینی چاہیے، تاکہ وہ زمین اصل کسانوں کو واپس کی جا سکے۔ کان کنی سے متاثرہ علاقوں میں لوگوں کی بحالی، روزگار، ماحولیاتی توازن اور انفراسٹرکچر کی ترقی کو ترجیح دی جائے۔ مرکزی وزیر مملکت برائے کوئلہ ستیش چندر دوبے نے وزیر اعلیٰ ہیمنت سورین کے ذریعہ اٹھائے گئے نکات پر مثبت رویہ ظاہر کیا اور کہا کہ ریاست اور مرکز مل کر اس کا حل تلاش کریں گے۔ انہوں نے یقین دلایا کہ مرکزی حکومت جھارکھنڈ کی ترقی اور عوام کے مفاد کو مدنظر رکھتے ہوئے ہر ممکن تعاون فراہم کرے گی۔ اس میٹنگ میں چیف سکریٹری الکا تیواری، مائنز سکریٹری اروا راجکمل، مائنز ڈائرکٹر راہل سنہا، سی ایم پی ڈی آئی کے سی ایم ڈی منوج کمار، بی سی سی ایل کے سی ایم ڈی سمیرن دتہ، سی سی ایل کے سی ایم ڈی نیلندو کمار سنگھ اور بی سی سی ایل ڈی ٹی ایم کے اگروال موجود تھے۔
