آدیواسی کمزور نہیں؛ اقتدار بنانا اور دبلنا بھی جانتے ہیں

آدیواسی سماج اپنے حقوق کیلئے متحد ہو کر جدوجہد کرے : آسام میں انتخانی ریلی سے ہیمنت سورین کا خطاب

جدید بھارت نیوز سروس
ڈبرو گڑھ ، 29 مارچ:۔ آسام انتخابی مہم کے دوسرے دن، وزیر اعلیٰ ہیمنت سورین، جو جھارکھنڈ مکتی مورچہ کے مرکزی صدر بھی ہیں، نے ضلع ڈبرو گڑھ کے تِنگ کھونگ اور سوناری اسمبلی حلقوں میں پارٹی امیدواروں مہاویر باسکے اور بلدیو تیلی کے حق میں ایک بڑے عوامی جلسے سے خطاب کیا۔
اجرت اور حقوق کی بات اٹھائی
اپنے خطاب میں ہیمنت سورین نے کہا کہ آسام کی چائے کے باغان کی کمیونٹی، جو تقریباً 200 سالوں سے آسام کی معیشت کی ریڑھ کی ہڈی رہی ہے، آج بھی اپنے بنیادی حقوق سے محروم ہے۔ آسام میں چائے کے باغات کے مزدوروں کو روزانہ صرف 250 روپے اجرت ملتی ہے، جبکہ کرناٹک جیسی دیگر ریاستوں میں یہ تقریباً 600 روپے یومیہ ہے۔ انہوں نے مزید کہا کہ چائے کے باغات کے مزدوروں کو آج بھی زمین کے حقوق، باوقار رہائش، معیاری تعلیم اور بنیادی سہولیات میسر نہیں ہیں۔ برسوں سے مختلف سیاسی جماعتوں نے اس طبقے کو صرف ووٹ بینک کے طور پر استعمال کیا ہے، لیکن ان کے معیارِ زندگی میں کوئی خاطر خواہ بہتری نہیں آئی۔
آدیواسی سماج کا ووٹ بینک کے طور پر استعمال ہو رہا ہے
اپنے خطاب میں وزیر اعلیٰ نے قبائلی (آدیواسی) برادری کے ساتھ ہونے والے مسلسل استحصال کا مسئلہ نمایاں طور پر اٹھایا۔ انہوں نے الزام لگایا کہ بی جے پی حکومت ہر بار آدیواسیوں کو صرف استعمال کرتی ہے اور کام نکل جانے کے بعد انہیں ان کے حال پر چھوڑ دیتی ہے۔ آدیواسی سماج کو محض ووٹ بینک کے طور پر استعمال کیا جاتا ہے، جبکہ انہیں ان کے بنیادی حقوق سے محروم رکھا جاتا ہے۔ اب تبدیلی کا وقت آ گیا ہے اور آدیواسی سماج اپنے حقوق کے لیے متحد ہو کر جدوجہد کرے گا۔ جس طرح جھارکھنڈ میں ہمارے بزرگوں نے جدوجہد کے زور پر ریاست حاصل کی، اسی طرح اب آسام میں بھی اپنے حق اور وقار کے لیے جدوجہد کی جائے گی۔
آدیواسی اقتدار بدلنا بھی جانتے ہیں
آدیواسی سماج کی طاقت پر زور دیتے ہوئے انہوں نے کہا کہ آدیواسی کمزور نہیں ہیں، بلکہ وہ اقتدار بنانا بھی جانتے ہیں اور ضرورت پڑنے پر اقتدار کو بدلنا بھی جانتے ہیں۔ آدیواسی سماج اپنے حقوق لے کر رہے گا اور اس کے لیے مسلسل جدوجہد کرے گا۔ اپنے خطاب میں انہوں نے جھارکھنڈ کے بہادر شہیدوں کو خراجِ عقیدت پیش کرتے ہوئے کہا کہ جس طرح اسلاف نے تیر و کمان کے زور پر اپنے حقوق کی حفاظت کی، اسی راہ پر چلتے ہوئے اس الیکشن میں بھی آدیواسی سماج اپنی طاقت کا تعارف کروائے گا۔ انہوں نے چائے کے باغات اور آدیواسی برادری سے متحد ہو کر اپنے حقوق کے لیے جدوجہد کرنے کی اپیل کی اور آئندہ اسمبلی انتخابات میں جھارکھنڈ مکتی مورچہ کے امیدواروں کو کامیاب بنانے کی درخواست کی۔آسام کے سوناری اسمبلی حلقہ میں پارٹی امیدوار بلدیو تیلی کے حق میں جلسہ عام سے خطاب کرتے ہوئے ہیمنت سورین نے کہا کہ جھارکھنڈ کی طرح یہاں بھی نوجوانوں کو مواقع، محنت کشوں کو عزت اور قبائلی و مقامی سماج کو ان کا حق ملنا چاہیے۔ ترقی کا مطلب صرف اعداد و شمار نہیں، بلکہ ہر گھر تک پہنچنے والی خوشحالی ہے۔اس موقع پر جھارکھنڈ حکومت کے کئی کابینہ وزراء اور پارٹی کے سینئر ایم ایل اے بھی موجود تھے۔ جلسہ عام میں چائے کے باغات کے مزدوروں، آدیواسی برادری کے ارکان اور مقامی لوگوں نے ہزاروں کی تعداد میں شرکت کی۔