عطیہ دہندگان کو ’ہیلمٹ‘ بطور تحفہ دیا گیا
جدید بھارت نیوز سروس
ہزاریباغ،13؍اپریل: ’خون کا عطیہ عظیم عطیہ‘ ہے، اسے ہزاری باغ کے باشندوں نے سچ ثابت کر دکھایا ہے۔ یوتھ ونگ اور ضلع انتظامیہ کے اشتراک سے خون کے عطیے کے ایک کیمپ کا انعقاد کیا گیا، جس میں عطیہ دہندگان نے تقریباً 250 یونٹ خون کا عطیہ دیا۔ اسے ہزاری باغ میں اب تک کا سب سے بڑا بلڈ ڈونیشن کیمپ بتایا جا رہا ہے۔
مسلسل تین سالوں سے کیمپ کا انعقاد
ہزاری باغ میں یوتھ ونگ کے ذریعے منعقدہ اس کیمپ میں تقریباً 250 یونٹ خون جمع کیا گیا۔ یوتھ ونگ ہزاری باغ کے نوجوانوں کی ایک ایسی ٹیم ہے جس میں طلبہ، صحافی، تاجر اور سیاست دان شامل ہیں۔ یہ تنظیم گزشتہ 3 سالوں سے مسلسل خون کے عطیے کے کیمپ منعقد کر رہی ہے۔ اس بار کی بڑی کامیابی 250 یونٹ خون کا جمع ہونا ہے۔
مقررہ وقت سے ہی ہزاری باغ کے لوگ خود بخود خون کا عطیہ دینے پہنچنے لگے۔ ضلع میں ان دنوں خون کی کمی بھی ہے، خاص طور پر تھیلیسیمیا کے مریضوں کو کافی پریشانیوں کا سامنا کرنا پڑتا ہے۔ہزاری باغ کے لوگوں نے خون کا عطیہ دے کر معاشرے کو یہ پیغام دیا ہے کہ دوسروں کی جان بچانے کے لیے آگے آنا چاہیے۔ گزشتہ ایک ماہ سے اس کیمپ کی تیاریاں جاری تھیں۔ گورنر سنتوش کمار گنگوار اور مرکزی وزیر اناپورنا دیوی سمیت کئی معزز شخصیات نے زیادہ سے زیادہ خون کا عطیہ دینے کی اپیل کی تھی، جس کا نتیجہ ایک ہی دن میں 250 یونٹ خون کی صورت میں سامنے آیا۔عطیہ دہندگان نے بھی کہا کہ ہزاری باغ میں یہ ایک بہترین کوشش تھی جس نے عام لوگوں کو بیدار کیا کہ ان کا ایک یونٹ خون کسی کی جان بچا سکتا ہے۔ ساتھ ہی خون دینے والے خود بھی صحت مند رہتے ہیں۔اس کیمپ کی ایک خاص بات یہ تھی کہ خون کا عطیہ دینے والوں کو تحفے میں ہیلمٹ دیا گیا۔ اس تحفے کے پیچھے کی وجہ بھی دلچسپ ہے۔ یوتھ ونگ کے ارکان کا کہنا ہے کہ جن لوگوں نے ہمیں خون دیا ہے، ان کی زندگی کی حفاظت کرنا بھی ہماری ذمہ داری ہے۔ اسی مقصد کے تحت خون کا عطیہ دینے والوں کو ‘ہیلمٹ‘پیش کیا گیا تاکہ وہ سڑکوں پر بھی محفوظ رہ سکیں۔
