جنیوا، 17 اکتوبر (یو این آئی) عالمی ادارہ صحت (ڈبلیو ایچ او) نے اسرائیل پر زور دیا ہے کہ وہ انسانی ہمدردی کے مشنوں کو ضروری خوراک اور طبی سامان شمالی غزہ تک پہنچانے کی اجازت دے، جو وہاں جاری تشدد کی وجہ سے پہنچنے سے قاصر ہیں۔ڈبلیو ایچ او اور اس کے شراکت داروں نے پیر کو پولیو ویکسینیشن مہم کے دوسرے دور کا آغاز کیا، جس کا مقصد نصف ملین سے زائد بچوں کو پولیو سے بچانا ہے۔ڈبلیو ایچ او کے سربراہ ٹیڈروس ایڈنوم گیبریئس نے بدھ کے روز ایکس پر لکھا”وسطی غزہ میں دو دن کے قطرے پلانے کے بعد پولیو ویکسین کی دوسری خوراک حاصل کرنے والے بچوں کی کل تعداد 156,943 تک پہنچ گئی ہے“۔ انہوں نے کہا کہ اس وقت جاری تشدد سے تقریباً 90 فیصد بچوں کو قطرے پلانے کی مہم کے ہدف کو خطرہ ہے۔چیف نے کہا کہ پولیو ویکسین کے علاوہ بچوں کو وٹامن اے کی سپلیمنٹس دی جا رہی ہیں تاکہ ان کی قوت مدافعت مضبوط ہو سکے۔ انہوں نے بتایا کہ اکتوبر میں شمالی غزہ میں اقوام متحدہ کے 54 طے شدہ مشنوں میں سے صرف ایک کامیابی کے ساتھ مکمل ہوا تھا، باقی تنازعات کی وجہ سے منسوخ یا منقطع ہو گئے تھے۔
