زہران ممدانی نے میئر بن کر’درست اقدامات‘ نہ کیے تو نیویارک کی فنڈنگ روک دیں گے: ٹرمپ کی دھمکی

واشنگٹن، 30 جون (یو این آئی) :امریکی صدر ڈونلڈ ٹرمپ نے خبردار کیا ہے کہ اگر نیویارک سٹی کے میئر کے لیے ڈیموکریٹک امیدوار زہران ممدانی نے ’درست اقدامات‘ نہ کیے تو وہ شہر کی وفاقی فنڈنگ روک سکتے ہیں۔ترک خبر رساں ادارے ’انادولو‘ کی رپورٹ کے مطابق ٹرمپ نے یہ دھمکی اتوار کو ’فاکس نیوز‘ کو دیے گئے ایک انٹرویو کے دوران دی جس میں انہوں نے ممدانی کو نشانہ بنایا، جو منگل کو میئر کے لیے ڈیموکریٹک نامزدگی حاصل کرنے میں کامیاب ہوئے تھے۔ڈونلڈ ٹرمپ نے کہا کہ ’اگر وہ منتخب ہو جاتے ہیں تو میں صدر ہوں، اور انہیں درست اقدام کرنا ہوگا، ورنہ انہیں ایک پائی بھی نہیں ملے گی، انہیں صحیح کام کرنا ہوگا‘۔انہوں نے اس دھمکی کو کسی بھی مستقبل کے نیویارک کے میئر تک وسعت دیتے ہوئے کہا کہ ’جو بھی نیویارک کا میئر ہوگا، اسے ٹھیک سے پیش آنا ہوگا، ورنہ وفاقی حکومت ان کے ساتھ مالی طور پر بہت سختی سے نمٹے گی‘۔ڈونلڈ ٹرمپ اس سے قبل بھی مختلف ریاستوں اور یونیورسٹیوں کو دھمکی دے چکے ہیں کہ اگر وہ ان کی پالیسیوں پر عمل نہ کریں تو ان کی وفاقی فنڈنگ بند کر دی جائے گی۔انہوں نے زہران ممدانی کو کمیونسٹ قرار دیا اور ان کی ممکنہ جیت پر حیرت کا اظہار کیا۔انہوں نے کہا کہ وہ ایک کمیونسٹ ہے، میرے خیال میں یہ نیویارک کے لیے بہت نقصان دہ ہے۔ان کا کہنا تھا کہ ’یہ حیران کن ہے، میں پہلے کہا کرتا تھا کہ ہمارے ملک میں کبھی کوئی سوشلسٹ نہیں ہوگا، نہیں، بلکہ اب ہمارے پاس ایک کمیونسٹ ہوگا‘۔واضح رہے کہ زہران ممدانی نے گزشتہ منگل کو ہونے والے پرائمری انتخاب میں سابق نیویارک گورنر اینڈریو کومو کو شکست دی تھی، اور وہ نیویارک سٹی کے پہلے مسلمان میئر بننے کی پوزیشن میں آگئے ہیں۔ڈیموکریٹک امیدوار زہران ممدانی فلسطین کے کھلے عام حامی اور اسرائیل کے ناقد رہے ہیں۔انہوں نے ’اسٹوڈنٹس فار جسٹس ان فلسطین‘ کے بوڈوئن کالج چیپٹر کی بنیاد رکھی تھی اور 2023 میں انہوں نے وائٹ ہاؤس کے باہر جنگ بندی کے مطالبے پر ایک بھوک ہڑتال میں بھی شرکت کی تھی۔