کئی ملکوں کے شہری امیگرینٹ ویزے پرامریکا آنے کے بعد واپس نہیں جاتے
امریکا نے امیگرینٹ ویزا پراسیسنگ غیرمعینہ مدت کیلئے روکی ہے۔ امریکی وزارت خارجہ
واشنگٹن 15 جنوری (ایجنسی) اسلام آباد ( اردوپوائنٹ اخبار تازہ ترین ۔ انٹرنیشنل پریس ایجنسی۔ 14 جنوری 2026ء) امریکا نے پاکستان سمیت 75 ممالک کیلئے امیگرینٹ ویزہ پراسیسنگ روک دی۔ میڈیا کے مطابق جن ممالک کی امیگرینٹ ویزہ پراسیسنگ روکی گئی گئی ان سے متعلق کہا گیا ہے کہ فہرست میں شامل ممالک کے لوگ غلط بیانی کرکے امریکا آتے ہیں، کئی ملکوں کے شہری امیگرینٹ ویزے پرامریکا آنے کے بعد واپس نہیں جاتے۔امریکی وزارت خارجہ نے پبلک چارج رول کے مطابق امیگرینٹ ویزہ پراسیسنگ منجمد کی۔ فراڈ ، جانچ پڑتال اور حکومت پر بوجھ بننے کے خدشات کے باعث فیصلہ کیا گیا۔ امریکا نے پاکستان سمیت 75ممالک کیلئے امیگرینٹ ویزہ پراسیسنگ غیرمعینہ مدت کیلئے روکی ہے۔ ان ممالک میں صومالیہ ، سوڈان، تنزانیہ ، شام ، تھائی لینڈ، تیونس ، یوگنڈا، یمن، یوراگوئے، ازبکستان بھی شامل ہے۔مزید برآں امریکی صدر ڈونلڈ ٹرمپ کا کہنا ہے کہ امریکی شہریوں کو دھوکہ دینے والے تارکین وطن کی شہریت منسوخ ہوگی۔ ڈیٹرائٹ اکنامک کلب میں منعقد ہونے والی تقریب سے خطاب کرتے ہوئے انہوں نے کہا کہ ہماری انتظامیہ صومالیہ یا کسی بھی دوسرے ملک سے تعلق رکھنے والے ایسے تارکین وطن کی شہریت منسوخ کرنے جا رہی ہے جنہوں نے ہمارے کسی شہری کو دھوکہ دیا ہو، ہم ان لوگوں کے خلاف کارروائی کرنے جا رہے ہیں جنہوں نے ہمارے شہریوں کو دھوکہ دیا ہو اور اس میں انہیں سزا ہوئی ہو، ایسے لوگوں کی شہریت منسوخ کر دی جائے گی۔بتایا جارہا ہے کہ امریکہ نے ویزہ قوانین کی خلاف ورزیوں سے متعلق کارروائی کرتے ہوئے ایک لاکھ سے زائد افراد کے ویزے منسوخ کر دیئے ہیں جن میں ہزاروں غیر ملکی طلباء اور روزگار کے لیے آنے والے افراد بھی شامل ہیں، امریکی محکمہ خارجہ نے بتایا کہ صدر ڈونلڈ ٹرمپ کے دورِ صدارت کے پہلے سال کے دوران ایک لاکھ سے زیادہ ویزے منسوخ کیے گئے، ان میں کاروبار اور سیاحت کے ویزے رکھنے والے وہ افراد بھی شامل تھے جو مقررہ مدت ختم ہونے کے باوجود امریکہ میں قیام پذیر رہے۔محکمہ خارجہ کا کہنا تھا کہ جن افراد کے ویزے منسوخ کیے گئے ان میں 8 ہزار طلبہ اور 2 ہزار 500 روزگار کے لیے آنے والے افراد شامل ہیں، زیادہ تر کیسز میں افراد کے خلاف مجرمانہ ریکارڈ یا قانونی خلاف ورزیوں کے شواہد موجود تھے، جب کہ دسمبر کے آخر میں امریکی انتظامیہ نے سفری پابندیوں کی فہرست میں مزید پانچ ممالک کو شامل کیا، بعض دیگر ممالک کے لیے ویزے کی شرائط مزید سخت کی گئیں، اسی طرح جون میں صدر ڈونلڈ ٹرمپ نے اعلان کیا تھا کہ 12 ممالک کے شہری امریکہ کا سفر نہیں کرسکیں گے، سات ممالک کے شہریوں کو پابندیوں کا سامنا ہو گا۔
