اقوام متحدہ امن فوج کے دستے میں شامل بھارتی فوجی بھی پھنسے
کنشاسا، 30 جنوری (ہ س)۔ افریقی ملک ڈیموکریٹک ریپبلک آف کانگو (ڈی آر سی) کے مشرقی شہر گوما پر ایم 23 باغیوں نے قبضہ کر لیا ہے۔ اطلاعات کے مطابق ان باغیوں کو پڑوسی ملک روانڈا کی حمایت حاصل ہے۔ اس تنازعہ کے درمیان اقوام متحدہ کے امن مشن میں تعینات انڈین آرمی میڈیکل کور کے 80 افسران اورجوان پھنسے ہوئے ہیں۔ باغیوں نے کیمپ کو گھیرے میں لے لیا ہے جس میں لیول 3 کا ایک فیلڈ اسپتال ہے، جہاں ہندوستانی فوجی تعینات ہیں۔ گوما میں مسلسل فائرنگ اور راکٹ پروپیلڈ گرینیڈ (آر پی جی) حملے ہو رہے ہیں جس کی وجہ سے حالات انتہائی کشیدہ ہیں۔ اقوام متحدہ کے مطابق یہ حملہ نہ صرف امن مشن کے لیے خطرہ ہے بلکہ مقامی شہریوں کے لیے بھی تباہ کن ثابت ہو سکتا ہے۔ باغیوں نے گوما بین الاقوامی ہوائی اڈے پر بھی قبضہ کر لیا ہے جس کی وجہ سے اس علاقے تک کسی بھی بیرونی امداد کا پہنچنا تقریباً ناممکن ہو گیا ہے۔ اس ہوائی اڈے کا کنٹرول کھونے سے اقوام متحدہ اور دیگر امدادی تنظیموں تک سامان پہنچنے میں رکاوٹ آ سکتی ہے جس سے صورتحال مزید خراب ہو سکتی ہے۔ اس صورتحال پر گہری تشویش کا اظہار کرتے ہوئے امریکہ نے روانڈا کو سخت وارننگ جاری کی ہے۔ واشنگٹن نے اقوام متحدہ کی سلامتی کونسل سے اس حملے کو روکنے کے لیے فوری کارروائی کرنے کی اپیل کی ہے۔ اس کے علاوہ افریقی یونین نے باغیوں سے مطالبہ کیا ہے کہ وہ مقبوضہ علاقوں سے نکل جائیں۔ ساتھ ہی اقوام متحدہ کے سیکرٹری جنرل انتونیو گوٹیرس نے بھی کانگو کی صورتحال پر تشویش کا اظہار کرتے ہوئے کہا کہ ہمیں کانگو میں امن قائم کرنے کے لیے ہر ممکن کوشش کرنا ہو گی، ہم تمام فریقین سے امن برقرار رکھنے کی اپیل کرتے ہیں۔ آپ کو بتاتے چلیں کہ کانگو کے شمالی کیوو صوبے کا دارالحکومت گوما پہلے ہی تنازعات اور تشدد کا شکار ہے۔ اس شہر کی آبادی 20 لاکھ کے قریب ہے اور باغی یہاں تیزی سے اپنا کنٹرول مضبوط کر رہے ہیں۔ جھیل کنارے واقع اس شہر کے مختلف علاقوں میں اب بھی فائرنگ اور بم دھماکوں کی آوازیں سنائی دے رہی ہیں۔ تتسی قبیلے کے لوگ ایم 23 باغی گروپ کی قیادت کرتے ہیں۔ ان باغیوں کو روانڈا کی حمایت حاصل ہے۔ یہ باغی گروپ 30 سال قبل روانڈا میں ہونے والی نسل کشی کے بعد تشکیل دیا گیا تھا جس نے کانگو کو ہلا کر رکھ دیا تھا۔ اس نسل کشی میں ہوتو انتہا پسندوں نے توتسیوں اور اعتدال پسند ہوتو لوگوں کا قتل کیا تھا۔ اس کے بعد، کاگامے کی قیادت میں تتسی حمایت یافتہ دستوں نے علاقے سے ہوتو انتہا پسندوں کو بھگا کر امن قائم کیا تھا۔
