حوثیوں کا اسرائیل پر نیا حملہ، تل ابیب ایئرپورٹ اور فوجی اہداف نشانے پر

صنعا، 5 اپریل (یواین آئی): یمن کی حوثی جماعت نے دعویٰ کیا ہے کہ اس نے اسرائیل کے اندر مختلف مقامات کو نشانہ بناتے ہوئے ایک نئی فوجی کارروائی انجام دی ہے، جو حالیہ کشیدگی کے تناظر میں مسلسل حملوں کی کڑی ہے۔برطانوی خبر رساں ادارے رائٹرز کے مطابق حوثیوں نے ہفتہ کی رات میزائل اور فضائی حملے کیے، جن میں تل ابیب ایئرپورٹ اور اسرائیلی فوجی تنصیبات کو ہدف بنایا گیا۔حوثی جماعت کا کہنا ہے کہ یہ اس نوعیت کی پانچویں کارروائی ہے، جب سے 28 مارچ کو انہوں نے ایران پر جاری امریکی و اسرائیلی حملوں کے پس منظر میں جنگ میں براہِ راست شمولیت کا اعلان کیا تھا۔حوثیوں کے فوجی ترجمان یحییٰ سریع نے ایک بیان میں کہا کہ یہ سرحد پار کارروائی ایران اور لبنان کی حزب اللہ کے ساتھ مل کر کی گئی۔دوسری جانب اسرائیلی میڈیا کے مطابق حوثیوں کی جانب سے داغا گیا میزائل اسرائیل کے اندر کھلے علاقے میں گرا، جبکہ اسرائیلی فوج نے بھی تصدیق کی ہے کہ یمن سے ایک میزائل داغا گیا تھا۔اسرائیلی فوج کے مختصر بیان میں کہا گیا کہ میزائل کی بروقت نشاندہی کر لی گئی تھی اور فضائی دفاعی نظام اسے روکنے کے لیے فعال کر دیے گئے تھے۔یاد رہے کہ اس سے قبل گزشتہ جمعرات کو بھی حوثیوں نے اسرائیل پر چوتھا حملہ کیا تھا، جس میں ان کے ترجمان نے دعویٰ کیا تھا کہ بیلسٹک میزائلوں کے ذریعے مقبوضہ یافا میں اہم اہداف کو نشانہ بنایا گیا۔اس سے ایک روز قبل حوثیوں نے خبردار کیا تھا کہ اگر ایران اور اس کے اتحادیوں کے خلاف کوئی نیا اتحاد تشکیل دیا گیا یا بحیرہ احمر کو فوجی کارروائیوں کے لیے استعمال کیا گیا تو وہ براہِ راست جنگ میں شامل ہو جائیں گے۔بعد ازاں اسرائیلی فوج نے کہا تھا کہ 28 فروری کو جنگ کے آغاز کے بعد پہلی مرتبہ یمن سے اسرائیل کی جانب میزائل داغا گیا، جبکہ پیر کے روز دو ڈرون طیاروں کو فضا میں ہی تباہ کرنے کا بھی دعویٰ کیا گیا تھا۔