انٹرنیشنل اسپیس اسٹیشن سے جڑا اسپیس ایکس کا کریو-12 ڈریگن خلائی جہاز

لاس اینجلس، 15 فروری (یو این آئی) اسپیس ایکس کا ڈریگن خلائی جہاز ناسا کے کریو -12 مشن کے لئے چار خلابازوں کو لے کر جانے والا جہاز خودکار طریقے سے انٹرنیشنل اسپیس اسٹیشن (آئی ایس ایس) سے جا ملا ہے۔یہ خلائی جہاز جمعہ کی صبح 5:15 بجے (مشرقی امریکی وقت کے مطابق) امریکہ کی ریاست فلوریڈا کے کیپ کینیورل اسپیس فورس اسٹیشن سے فالکن-9 راکٹ کے ذریعے روانہ کیا گیا تھا۔ یہ ہفتہ کی دوپہر تقریباً 3:15 بجے (مشرقی وقت) آئی ایس ایس کے ہارمنی ماڈیول کے اسپیس۔فیسنگ پورٹ سے منسلک ہوا۔چار رکنی عملے میں ناسا کی خلاباز جیسیکا میر اور جیک ہیتھوے، یورپی خلائی ایجنسی کی خلاباز سوفی ایڈینوٹ اور روس کی خلائی ایجنسی روسکوسموس کے کاسموناؤٹ آندرے فیڈیایف شامل ہیں۔ناسا کے مطابق تقریباً آٹھ ماہ پر مشتمل اس مشن کے دوران کریو-12 سائنسی تحقیق انجام دے گا جس کا مقصد کم زمینی مدار سے آگے انسانی خلائی تحقیق کی تیاری کرنا اور زمین پر زندگی کو فائدہ پہنچانا ہے۔مشن کے تحت عملہ نمونیا پیدا کرنے والے بیکٹیریا کا مطالعہ کرے گا جس سے دل کے امراض کے علاج میں بہتری لانے میں مدد مل سکتی ہے۔ اس کے علاوہ مستقبل کے خلائی مشنز کے لیے ضرورت کے مطابق انٹراوینس سیال کی پیداوار کی تکنیکوں کا تجربہ کیا جائے گا جبکہ خلائی سفر کے دوران خون کے بہاؤ پر جسمانی خصوصیات کے اثرات کا مطالعہ بھی کیا جائے گا۔دیگر تجربات میں پودوں کی صحت کی خودکار نگرانی اور پودوں و نائٹروجن کو مستحکم کرنے والے خرد نامیوں کے درمیان باہمی تعامل پر تحقیق شامل ہے، جس سے خلا میں خوراک کی پیداوار کو بہتر بنانے میں مدد ملے گی۔