ایران کی حکمت عملی امریکی افواج کو خطے سے نکالنا ہے: شیکرچی

تہران، 4 اپریل (یواین آئی) ایرانی افواج کے جنرل اسٹاف کے ترجمان بریگیڈیئر جنرل ابوالفضل شیکرچی نے کہا ہے کہ جنگ میں ایران کی اسٹریٹجی امریکی افواج کو عرب ممالک سے نکالنا ہے۔میڈیا رپورٹس کے مطابق ابوالفضل شیکرچی نے ایرانی حکمت عملی کا خاکہ پیش کرتے ہوئے کہا کہ خطے کو امریکی فوجی اہلکاروں کے لیے ناقابل برداشت بنایا جائے گا۔انہوں نے کہا کہ ایران امریکی افواج پر اس وقت تک شدید دباؤ ڈالتا رہے گا جب تک وہ خطے سے نکل نہیں جاتے۔ترجمان نے اس عزم کا اظہار کیا کہ ایران خطے میں موجود امریکی فوجی اڈوں کو نشانہ بناتا رہے گا۔انہوں نے دعویٰ کیا کہ امریکی فوجیوں کو حملوں کے خطرے کے باعث ہوٹلوں اور بندرگاہوں میں پناہ لینے پر مجبور ہونا پڑا ہے۔ابوالفضل شیکرچی نے خبردار کیا کہ کسی بھی ممکنہ امریکی زمینی کارروائی کو “قتل گاہ” میں تبدیل کر دیا جائے گا تاکہ بھاری نقصان پہنچایا جا سکے۔آبنائے ہرمز کے حوالے سے انہوں نے کہا کہ اسے امریکی اور اسرائیلی جہازوں کے لیے بند کر دیا گیا ہے اور انہیں کسی بھی صورت وہاں سے گزرنے کی اجازت نہیں دی جائے گی۔