حزب اللہ نے گولانی بریگیڈ کے کیمپ پر ڈرون حملہ کیا
تل ابیب 15 اکتو بر (ایجنسی) اسرائیل کے آرمی چیف نے پیر کو کہا کہ ایک فوجی تربیتی مرکز پر حزب اللہ کا ڈرون حملہ جس میں ہفتے کے آخر میں کم از کم چار فوجی ہلاک ہوئے تھے، “مشکل اور تکلیف دہ” تھا۔حیفا شہر کے جنوب میں بنیامینا کے علاقے میں گولانی بریگیڈ کے تربیتی مرکز پر اتوار کی رات حملہ ہوا۔ اس جگہ کے دورے کے دوران لیفٹیننٹ جنرل ہرزی ہالیوی نے فوجیوں کو بتایا، “ہم حالتِ جنگ میں ہیں اور ملکی محاذ پر تربیتی مرکز پر حملہ مشکل اور اس کے نتائج تکلیف دہ ہیں۔”اتوار کے روز حزب اللہ نے کہا کہ اس نے اسرائیلی فوج کے گولانی بریگیڈ کے کیمپ پر “ڈرونز کے ایک غول” سے حملہ کیا۔گروپ نے ایک بیان میں کہا کہ چند بغیر پائلٹ طیارے اسرائیل کے فضائی دفاعی ریڈاروں کی نظروں میں آئے بغیر دراندازی میں کامیاب ہو گئے جن میں شامل چند ڈرون ماڈلز کو حزب اللہ نے پہلے استعمال نہیں کیا تھا۔اسرائیلی فوج نے کہا ہے کہ اس واقعے میں اس کے چار فوجی ہلاک اور سات شدید زخمی ہوئے ہیں۔ فوج نے کہا ہے کہ واقعے کی تحقیقات جاری ہیں۔
