سرمایہ کاری کے ذریعے ہندوستان اور الجزائر کے تعلقات کو مزید بلندی تک لے جا ئیں گے
الجزائر، 15 اکتوبر (یو این آئی)صدر جمہوریہ ہند، دروپدی مرمو، الجزائر، موریطانیہ، اور ملاوی کے اپنے سرکاری دوروں کے پہلے مرحلے پر، کل شام (13 اکتوبر 2024) الجزائر پہنچیں۔ الجزائر کے صدر عبدالمجیدتبون نے صدر دروپدی مرمو کا ہوائی اڈے پر شاندارطریقے سے استقبال کیا۔ یہ کسی ہندوستانی صدر کا الجزائر کا پہلا دورہ ہے۔محترمہ مرمو نے یہاں الجزائر کے صدر عبد المجيد تبون کے ساتھ دو طرفہ ملاقات میں دونوں ممالک کے درمیان تعلقات کو مضبوط بنانے پر تبادلہ خیال کیا۔راشٹرپتی بھون سکریٹریٹ نے منگل کو ایک بیان جاری کیا جس میں کہا گیا ہے کہ صدر جمہوریہ نے المراديہ پیلیس کا دورہ کیا، جہاں انہوں نے الجزائر کے صدر کے ساتھ تجارت اور سرمایہ کاری کے ذریعے ہندوستان اور الجزائر کے تعلقات کو مزید بلندی تک لے جانے کے طریقوں پر خصوصی توجہ دی۔محترمہ مرمو نے الجزائر کے لیے ہندوستان کی مسلسل حمایت اور افریقہ کے لیے ہندوستان کے عزم کا اعادہ کیا۔ دونوں صدور نے وفود کی سطح پر بات چیت کی اور پریس کو بیانات جاری کیے۔ اس سے قبل محترمہ مرمو نے الجزائر میں مقام الشيد یادگار پر گلہائے عقیدت نذر کئے اور الجزائر کی جدوجہد آزادی میں اپنی جانیں قربان کرنے والے فوجیوں کو خراج عقیدت پیش کیا۔ انہوں نے الجزائر کی آزادی کی جدوجہد کی یاد میں مجاہد کے قومی عجائب گھر کا بھی دورہ کیا۔صدر جمہوریہ نے بعد میں الجزائر- انڈین اکنامک فورم سے خطاب کیا جس کا اہتمام الجزائر کی اقتصادی تجدید کونسل اور فیڈریشن آف انڈین چیمبرز آف کامرس اینڈ انڈسٹری (فکی) نے مشترکہ طور پر کیا تھا۔اس سرکاری دورے پر صدر جمہوریہ کے ہمراہ وزیر مملکت جناب سکانتا مجمدار اور پارلیمانی رکن مکیش کمار دلال اور اتل گرگ بھی ہیں۔کل شام، صدر جمہوریہ نے الجزائر میں ہندوستان کے سفیر کی طرف سے منعقدہ استقبالیہ میں ہندوستانی برادری کے ارکان سےخطاب کیا۔
ہندوستانی برادری کے ارکان جو اس اجتماع میں شرکت کے لیے الجیریہ کے مختلف حصوں سے سفر کرکے وہاں پہنچے تھے ، صدر جمہوریہ نے ان پُرجوش شرکاء کی الجزائر کی معیشت میں ان کے تعاون کی تعریف کی۔ انہوں نے کہا کہ ہندوستانی حکومت اور بھارتی سماج نے، ہمیشہ ہندوستان کے درجے، وقار اور بیرون ملک اس کے قد میں اضافے میں ہندوستانی برادری کے تعاون کی قدر کی ہے اور اس کی تعریف کی ہے۔ الجزائر میں ہندوستانی برادری ہندوستان کے مفادات اور سافٹ پاور کو آگے لے جانے والا ایک پُل ہے۔ انہوں نے اس اعتماد کا اظہار کیا کہ ہندوستانی برادری اپنی کامیابیوں سے ہندوستان کا سر فخر سے بلند کرتے رہیں گے اور ہندوستان الجیریا تعلقات کی بہتری کے لیے کام کرتے رہیں گے۔صدر جمہوریہ نے الجزائر-ہندوستان اقتصادی فورم سے خطاب کیا، جس کا اہتمام مشترکہ طور پر الجزائر کی اقتصادی تجدید کونسل اور فیڈریشن آف انڈین چیمبرز آف کامرس اینڈ انڈسٹری (فکی ) نے کیا تھا۔اس موقع پر خطاب کرتے ہوئے صدر جمہوریہ نے کہا کہ ہند -الجزائر کے تعلقات میں اضافہ ہماری مشترکہ اقدار، مشترکہ چیلنجوں اور باہمی اعتماد پر مبنی ہے۔صدر جمہوریہ نے کہا کہ الجزائر کی تیز رفتار ترقی اور وسعت پذیر معیشت مختلف شعبوں میں بہت سے مواقع فراہم کرتی ہے۔ انہوں نے بھارتی کمپنیوں پر زور دیا کہ وہ الجزائر کی معیشت کے پیش کردہ مواقع میں شریک رہیں اور سرمایہ کاری کریں۔ صدر جمہوریہ کو یہ جان کر خوشی ہوئی کہ بھارت اور الجزائر کے درمیان مجموعی تجارت 1.7 (ایک ارب ستّر کڑور) امریکی ڈالر مالیت کی ہے۔ تاہم، اقتصادی تعلقات اس صلاحیت کو مکمل طور پر بروئے کار لانے میں کامیاب نہیں ہو سکے ہیں۔ انہوں نے توانائی، تعمیرات، آٹوموبائل، کھاد اور دواسازی میں ہمارے جاری تعاون کو تقویت دینے اور روشن مستقبل کے لیے تجارت اور سرمایہ کاری کے نئے اقدامات کی نشاندہی کرنے کی ضرورت پر زور دیا۔صدر جمہوریہ نے کہا کہ ہندوستان نے سائنس اور ٹیکنالوجی، آئی ٹی، فن ٹیک، فارما، خلا، اسٹارٹ اپس اور قابل تجدید ذرائع جیسے شعبوں میں بہت سی کامیابیاں حاصل کی ہیں۔ انہوں نے کہا کہ بھارت کو اپنے الجزائر کے شراکت داروں کے ساتھ ان شعبوں میں اپنے تجربات مشترک کرنے میں خوشی محسوس ہوگی ۔ صدر جمہوریہ نے کہا کہ ہندوستان میں ہوئی اصلاحات نے کاروبار کے قیام اور ترقی کو آسان بنا دیا۔ انہوں نے الجزائر کی کمپنیوں کو بھارت کے ’میک ان انڈیا‘ اور ’میک فار دی ورلڈ‘ کے اقدامات میں شامل ہونے کی دعوت دی۔
