بنگلہ دیش کی معیشت سنگین چیلنجز کا سامنا کر رہی ہے: طارق الرحمن

ڈھاکہ ۔15 ؍ فروری۔ ایم این این۔ بنگلہ دیش کے وزیر اعظم منتخب طارق الرحمن نے کہا ہے کہ بنگلہ دیش کی معیشت “انتہائی نازک” صورتحال میں ہے اور نئی انتظامیہ کے لیے سب سے بڑا چیلنج اسے مستحکم کرنا ہوگا۔ ان کا کہنا تھا کہ فوری ترجیحات میں معیشت کی بحالی، بہتر حکمرانی اور قانون و انتظام کی بحالی شامل ہیں، جس کے لیے کاروبار کو فروغ دینے اور روزگار کے مواقع بڑھانے پر کام کیا جائے گا۔ طارق الرحمن کی جماعت بنگلہ دیش نیشنلِسٹ پارٹی (بی این پی) نے حالیہ عام انتخابات میں دو تہائی اکثریت سے کامیابی حاصل کی، جس کے نتیجے میں وہ اقتدار میں واپس آئے ہیں۔ انہوں نے چین کو “ترقیاتی دوست” قرار دیتے ہوئے تعاون کی امید بھی ظاہر کی۔ انہوں نے کہا کہ نئی حکومت کا فوکس نہ صرف اقتصادی بہتری پر ہوگا بلکہ عوامی فلاح و بہبود اور مؤثر حکمرانی کو بھی یقینی بنائے گا، تاکہ ملک کو پائیدار ترقی کے راستے پر گامزن کیا جا سکے۔ انتخابات کے ساتھ ہی قومی آئینی ریفرنڈم بھی کامیاب رہا، جس میں وزرائے اعظم کے دورِ حکومت کی مدت، عدالتی آزادی اور خواتین کی نمائندگی جیسے اصلاحات شامل ہیں۔ ماہرین کے مطابق یہ اصلاحات سیاسی استحکام کی جانب ایک اہم قدم ہیں، حالانکہ سیاسی ماحو ل ابھی بھی نازک ہے۔