بنگلہ دیش عوامی لیگ نے پارٹی کی سرگرمیوں پر پابندی کے عبوری حکومت کے فیصلے کو مستردکیا

ڈھاکہ ۔12؍مئی۔ ایم این این۔ معزول وزیر اعظم شیخ حسینہ کی سربراہی میں بنگلہ دیش عوامی لیگ نے پارٹی کی سرگرمیوں پر پابندی کے عبوری حکومت کے فیصلے کو مسترد کر دیا۔ پارٹی نے ہفتہ کو دیر گئے ایک بیان میں کہا کہ عوامی لیگ اپنی سرگرمیاں چلائے گی۔ بیان میں کہا گیا ہے کہ”بنگلہ دیش کے عوام غیر قانونی اور غیر آئینی قابض فاشسٹ یونس حکومت کی جانب سے عوامی لیگ کی سرگرمیوں پر پابندی لگانے کے اعلان سے حیران اور مشتعل ہیں”۔ بیان میں کہا گیا ہے کہ ہم فاشسٹ ڈکٹیٹر یونس حکومت کے اس فیصلے کو نفرت کے ساتھ مسترد کرتے ہیں اور اس کی شدید مذمت اور احتجاج کرتے ہیں”۔ بیان میں کہا گیا ہے کہ “اس کے ساتھ ہی ہم اس عزم کا اظہار کرتے ہیں کہ بنگلہ دیش عوامی لیگ فاشسٹ یونس حکومت کے اس فیصلے کو نظر انداز کرتے ہوئے اپنی سرگرمیاں صحیح طریقے سے جاری رکھے گی۔” قبل ازیں نوبل انعام یافتہ محمد یونس کی سربراہی میں بنگلہ دیش کی عبوری حکومت کی کابینہ نے انسداد دہشت گردی ایکٹ کے تحت عوامی لیگ کی سائبر سپیس سمیت تمام سرگرمیوں پر پابندی لگانے کا فیصلہ کیا تھا۔ عوامی لیگ کے فیس بک پیج پر پوسٹ کیے گئے بیان میں کہا گیا ہے کہ آج کا دن بنگلہ دیش کی تاریخ میں ایک سیاہ دن کے طور پر منایا جائے گا۔ عوامی لیگ، وہ جماعت جس کی قیادت میں بنگلہ دیش ایک آزاد اور خودمختار ریاست کے طور پر قائم ہوا تھا، کی سرگرمیوں پر آزاد ملک میں غیر جمہوری فاشسٹ یونس حکومت نے پابندی لگا دی ہے، جسے عوام کا کوئی مینڈیٹ حاصل نہیں ہے۔ اس نے مزید کہا کہ”اس سے ثابت ہوتا ہے کہ فاشسٹ یونس حکومت بنگلہ دیش کی سرزمین کو آزادی مخالف بری طاقتوں اور انتہا پسند گروہوں کے لیے ایک زرخیز میدان میں تبدیل کرنا چاہتی ہے۔ بنگالی سرزمین پر عوامی لیگ کی سرگرمیوں پر پابندی لگانے کا مطلب جنگ آزادی کے جذبے، نظریات اور بنیادی باتوں کو ختم کرنا اور آزادی کے مخالفوں کی ننگی جارحیت کو ہوا دینا ہے۔ بیان میں کہا گیا، “بنگلہ دیش عوامی لیگ اس علاقے کی سب سے قدیم اور روایتی سیاسی تنظیم ہے، جس کی 75 سالہ تاریخ ہے، اور ایک ایسا ادارہ ہے جس پر عوام کا بھروسہ ہے۔ بنگلہ دیش عوامی لیگ نے بنگالی قوم کی تمام عظیم کامیابیوں بشمول زبان اور آزادی کے مطالبے کے قیام میں قائدانہ کردار ادا کیا ہے”۔