امریکہ میں ییلو اسٹون نیشنل پارک کے قریب سڑک حادثہ، سات افراد ہلاک

واشنگٹن، 3 مئی (ہ س)۔ امریکہ کے پہلے قومی پارک یلو اسٹون نیشنل پارک کے قریب یو ایس ہائی وے-20 پر ایک سڑک حادثے میں کم از کم سات افراد ہلاک ہو گئے۔ ہلاک ہونے والوں میں چھ غیر ملکی شہری اور ایک مقامی پک اپ ڈرائیور شامل ہے۔ غیر ملکی شہری ایک وین میں سفر کر رہے تھے۔ یہ حادثہ دو گاڑیوں کے درمیان تصادم کے باعث پیش آیا۔ تصادم کے بعد دونوں گاڑیوں میں آگ لگ گئی۔ اے بی سی نیوز چینل نے ایڈاہو سٹیٹ پولیس کے حوالے سے خبر دی کہ یہ حادثہ یو ایس ہائی وے 20 پر ہینریز جھیل کے قریب جمعرات کی شام 7:15 پر پیش آیا۔ پولیس کے مطابق ایک مرسڈیز مسافر ٹور وین جھیل کے قریب ڈاج رام پک اپ سے ٹکرا گئی۔ وین میں 14 افراد اور ڈرائیور پک اپ میں سوار تھے۔ پولیس نے بتایا کہ حادثے میں وین میں سوار چھ غیر ملکی شہری اور پک اپ ڈرائیور کی موت ہو گئی۔ پک اپ ڈرائیور کی شناخت ہمبل، ٹیکساس کے 25 سالہ یسایا مورینو کے نام سے ہوئی ہے۔ پولیس نے واضح کیا ہے کہ حادثے میں ہلاک ہونے والے غیر ملکی شہریوں کی شناخت ہو گئی ہے۔ فریمونٹ کاؤنٹی کورونر کا دفتر ان کے اہل خانہ کو مطلع کرے گا۔ اس کے بعد ان کے نام اور پتے جاری کیے جائیں گے۔ ایڈاہو سٹیٹ پولیس نے جمعہ کی سہ پہر ایک بیان میں کہا کہ حادثے کی شدت کی وجہ سے، تمام ملوث افراد کی شناخت کرنے اور ان کے قریبی رشتہ داروں کو مطلع کرنے میں وقت لگے گا۔ پولیس نے راحت اور بچاؤ کے کاموں میں راہگیروں کے کردار کی تعریف کی ہے۔ پولیس نے بتایا کہ حادثے میں ملوث تمام افراد کو اسپتال لے جایا گیا ہے۔ ان میں سے تین کو ایئر ایمبولینس کے ذریعے لے جایا گیا۔
پولیس کے مطابق ہینریز جھیل یلو اسٹون نیشنل پارک کے داخلی راستے پر ہے، جو ویسٹ یلو اسٹون، مونٹانا سے تقریباً 17 میل دور ہے۔ حادثے کے بعد یو ایس ہائی وے 20 تقریباً سات گھنٹے تک بند رہا۔ ییلو اسٹون نیشنل پارک کا بڑا حصہ ریاست وائیومنگ میں ہے۔ یہ مونٹانا اور ایڈاہو کی ریاستوں کی سرحدوں تک بھی پھیلا ہوا ہے۔ ییلو اسٹون پارک امریکہ کا پہلا قومی پارک ہے۔
2.2 ملین ایکڑ سے زائد رقبے پر پھیلا یہ پارک 1872 میں قائم کیا گیا تھا۔