میکسیکو سٹی، 2 نومبر (یو این آئی) میکسیکو کے شمالی حصے میں واقع ریاست سونورا کے شہر ہرمو سیلو میں ایک سپرمارکیٹ میں دھماکے میں بچوں سمیت کم از کم 23 افراد ہلاک اور 11 زخمی ہو گئے۔ فرانسیسی خبر رساں ادارے اے ایف پی کے مطابق تفتیش کاروں کا کہنا ہے کہ دھماکہ غالباً خراب برقی ٹرانسفارمر کے باعث ہوا۔ ریاست کے گورنر الفونسو دورازو نے واقعے کی وجوہات جاننے کے لیے شفاف اور جامع تحقیقات کا حکم دے دیا ہے۔ریاست سونورا کے گورنر الفونسو دورازو نے ایک ویڈیو پیغام میں بتایا کہ افسوس کے ساتھ کہنا پڑتا ہے کہ جن متاثرین کی لاشیں ملی ہیں، ان میں کچھ نابالغ بچے بھی شامل ہیں۔انہوں نے بتایا کہ 23 افراد ہلاک اور 11 زخمی ہوئے ہیں، زخمیوں کو ہرمو سیلو شہر کے مختلف ہسپتالوں میں منتقل کیا گیا ہے، جہاں دھماکا ہوا تھا۔دورازو نے کہا کہ میں نے اس واقعے کی وجوہات معلوم کرنے اور ذمہ داروں کا تعین کرنے کے لیے وسیع اور شفاف تحقیقات کا حکم دے دیا ہے۔پراسیکیوٹر کے دفتر نے ایک بیان میں کہا کہ ابتدائی مفروضہ یہ ہے کہ یہ واقعہ حادثاتی تھا، اور تحقیقات کا مرکز ایک ٹرانسفارمر ہے جو سپرمارکیٹ کے اندر نصب تھا۔بیان میں مزید کہا گیا کہ جب فائر بریگیڈ جائے وقوع میں داخل ہونے کی اجازت دے گا تو واقعے کی اصل وجہ کا درست تعین ممکن ہو سکے گا۔دھماکا والڈوز نامی اسٹور میں شہر کے مرکزی علاقے میں ہوا۔گورنر نے کہا کہ کوئی بھی اس دکھ کا سامنا اکیلا نہیں کرے گا، ابتدا ہی سے ہنگامی امداد، سیکیورٹی اور صحت کے اداروں نے انتہائی پیشہ ورانہ اور عزم کے ساتھ کام کیا، صورتحال پر قابو پایا اور جانیں بچائیں۔میکسیکو کی صدر کلاڈیا شینباوم نے ’ایکس‘ پر اپنے تعزیتی پیغام میں کہا کہ میں ان تمام خاندانوں اور عزیزوں سے دلی ہمدردی کا اظہار کرتی ہوں جنہوں نے اپنے پیاروں کو کھو دیا۔
