بابولال مرانڈی نے خراج عقیدت پیش کیا
جدید بھارت نیوز سروس
رانچی، 24 اپریل (ہ س)۔ جموں و کشمیر کے پہلگام میں دہشت گردانہ حملے میں ہلاک ہوئے انٹیلیجنس بیورو (آئی بی) افسر منیش رنجن کی لاش جمعرات کو رانچی ہوائی اڈے پر لائی گئی۔ اس موقع پر بی جے پی کے ریاستی صدر اور اپوزیشن لیڈر بابولال مرانڈی نے بھی وہاں پہنچ کر خراج عقیدت پیش کیا۔ اس دوران بی جے پی کے راجیہ سبھا ایم پی پردیپ ورما، رانچی صدر ورون ساہو اور دیگر لیڈروں نے خراج عقیدت پیش کیا۔ اس کے بعد لاش کو مغربی بنگال کے جھلدا بھیج دیا گیا۔ اس موقع پر آنجہانی منیش رنجن کے والد منگلیش مشرا نے کہا کہ مرکزی حکومت کو دہشت گردوں کے خلاف سخت کارروائی کرنی چاہیے۔اس موقع پر بابو لال مرانڈی نے صحافیوں سے کہا کہ دہشت گردوں کا یہ واقعہ قابل معافی نہیں ہے۔ بھارتی حکومت اس واقعہ کو سنجیدگی سے لے رہی ہے۔ جن جگہوں سے اس حملے کو اسپانسر کیا گیا ہے انہیں بھی نہیں بخشا جائے گا۔ یہ واقعہ صرف 26 لوگوں کے قتل کا نہیں ہے بلکہ ملک کے 140 کروڑ ہندوستانیوں پر گولیاں برسانے کا ہے۔ مرکزی حکومت اس کا مناسب جواب دینے کے لیے پرعزم ہے۔ آئی بی افسر منیش رنجن کو گزشتہ منگل کو جموں و کشمیر کے پہلگام میں ایک سیاحتی مقام پر دہشت گردانہ حملے میں گولی مار کر ہلاک کر دیا گیا تھا۔ منیش رنجن حیدرآباد میں آئی بی کے سیکشن آفیسر کے طور پر تعینات تھے۔ وہ اپنی بیوی جیا مشرا، 12 سالہ بیٹے اور 8 سالہ بیٹی کے ساتھ کشمیر کی سیر کرنے گئے تھے۔ جہاں دہشت گردانہ حملے میں منیش کی موت ہو گئی۔
بابولال مرانڈی نے پہلگام دہشت گردانہ حملے میں شہید ہوئے
منیش رنجن کے جسد خاکی کو خراج عقیدت پیش کیا
رانچی: بی جے پی کے ریاستی صدر اور قائد حزب اختلاف بابولال مرانڈی نے جمعرات کو ہوائی اڈے پر پہلگام دہشت گردانہ حملے میں شہید ہوئے منیش رنجن کے جسد خاکی کو خراج عقیدت پیش کیا اور ان کی روح کی شانتی کے لیے دعا کی۔ اس موقع پر ریاستی جنرل سکریٹری اور ایم پی ڈاکٹر پردیپ ورما، سبودھ سنگھ گڈو، ورون ساہو اور دیگر موجود تھے۔ مرانڈی نے کہا کہ یہ واقعہ غیر متوقع اور چونکا دینے والاہے جس میں مذہب کی بنیاد پر لوگوں کو نشانہ بنایا گیا ہے۔ انہوں نے کہا کہ وزیر اعظم نریندر مودی کی قیادت میں ہندوستان ایسی ذہنیت میں پروان چڑھنے والے دہشت گردوں کو تباہ کرنے کے لیے پرعزم ہے۔ انہوں نے کہا کہ جھارکھنڈ میں بھی ایسی ہی ذہنیت کے لوگ ہیں جو شریعت کو آئین سے بالاتر سمجھتے ہیں۔ انہوں نے کہا کہ ایسے لوگوں کو سیکولرازم کے نام پر ووٹ بینک کے لیے ریاستی حکومت سے تحفظ مل رہا ہے۔ جبکہ ایسے لوگوں پر غداری کا مقدمہ درج کر کے جیل بھیج دیا جائے۔
