ہماچل اپنی قدرتی ورثے اور بہادری کیلئےجانا جاتا ہے:گورنر
جدید بھارت نیوز سروس
رانچی، 15اپریل: گورنر سنتوش کمار گنگوار کی موجودگی میں راج بھون، رانچی میں ‘ہماچل پردیش یوم تاسیس کی تقریب ‘ کا انعقاد بڑے جوش و خروش کے ساتھ کیا گیا۔ اس موقع پر جھارکھنڈ میں مقیم ہماچل پردیش کے شہری موجود تھے۔ تقریب سے خطاب کرتے ہوئے گورنر نے سبھی کو ہماچل پردیش کے یوم تاسیس کی مبارکباد دی۔ انہوں نے کہا کہ ہماچل نہ صرف اپنی قدرتی خوبصورتی اور روحانی ورثے کے لیے جانا جاتا ہے بلکہ ریاست بہادری، خدمت اور حب الوطنی کے جذبے سے بھی لبریز ہے۔ انہوں نے کہا کہ ہماچل پردیش نہ صرف ‘دیو بھومی ‘ ہے بلکہ یہ ایک ایسی سرزمین ہے جہاں سادہ، محنتی اور محب وطن لوگوں نے ہندوستان کو ایک خود انحصار اور مضبوط قوم کے طور پر قائم کرنے میں مثالی کردار ادا کیا ہے۔انہوں نے یہ بھی بتایا کہ ہماچل نے تعلیم، صحت، خواتین کو بااختیار بنانے، صفائی ستھرائی، سبز توانائی اور نامیاتی زراعت جیسے شعبوں میں اہم کامیابیاں حاصل کی ہیں۔ سیاحت کے نقطہ نظر سے بھی ہماچل پردیش نے اب عالمی نقشے پر اپنی منفرد شناخت بنائی ہے۔ گورنر نے کہا کہ وزیر اعظم کی دور اندیش قیادت میں ہماچل پردیش کو ایک ‘گرین اسٹیٹ ‘ اور ‘آرگینک ایگریکلچر ہب ‘ کے طور پر ترقی دینے کی مسلسل کوششیں کی جا رہی ہیں، جو پائیدار ترقی اور ماحولیاتی توازن کی سمت ایک متاثر کن پہل ہے۔ انہوں نے اس بات پر زور دیا کہ ‘ایک بھارت، شریشٹھ بھارت ‘ پہل کے تحت اس طرح کی تقریبات باہمی ہم آہنگی، ثقافتی تبادلے اور قومی اتحاد کے جذبے کو مزید تقویت دیتی ہیں۔ اس موقع پر خطبہ استقبالیہ پیش کرتے ہوئے گورنر کے ایڈیشنل چیف سکریٹری ڈاکٹر نتن کلکرنی نے کہا کہ راج بھون ’ایک بھارت، شریشٹھ بھارت‘ مہم کے تحت مختلف ریاستوں کا یوم تاسیس مناتا ہے، جو قومی اتحاد، ہم آہنگی اور مشترکہ ثقافتی ورثے کو فروغ دیتا ہے۔ ہماچل پردیش کو قدرتی اور ثقافتی طور پر امیر بتاتے ہوئے انہوں نے اسے سیاحوں کے لیے ایک منفرد مقام قرار دیا۔
