National

‘ڈبل انجن والی حکومت جنگل راج کی گارنٹی! راہل گاندھی کا بی جے پی حکومت پر نشانہ

95views

لکھنؤ: کانگریس لیڈر راہل گاندھی نے رامپور میں دلت طالب علم کے قتل کا حوالہ دیتے ہوئے یوپی کی یوگی آدتیہ ناتھ حکومت کو نشانہ بنایا ہے۔ انہوں نے کہا کہ یوپی میں نظم و نسق کی صورت حال ابتر ہے جس کی ’مودی میڈیا‘ میں ستائش کی جاتی ہے اور ڈبل انجن حکومت ’جنگل راج کی گارنٹی‘ ہے۔

راہل گاندھی نے ایکس پر لکھا، ’’بی جے پی اور مودی میڈیا مل کر کیسے ’جھوٹ کا کاروبار‘ کر رہے ہیں، اتر پردیش کی امن و امان کی صورتحال اس کی سب سے بڑی مثال ہے۔ کہیں، درخت سے لٹکی نابالغ بہنوں کی لاشیں، تو کہیں اینٹوں سے کچل کر قتل کی واردات۔ کہیں آئی آئی ٹی-بی ایچ یو کیمپس میں بی جے پی کے ارکان کے ذریعہ اجتماعی عصمت دری کی بے حیائی، تو کہیں انصاف نہ ملنے پر خودکشی کو مجبور خاتون جج۔‘‘

راہل گاندھی نے مزید کہا، ’’یہ اس ریاست کا حال ہے جس کے امن و امان کے نظام کی مودی میڈیا تعریف کرتے نہیں تھکتا۔ امبیڈکر میموریل کے مطالبے پر رامپور میں دسویں کے امتحان سے واپس لوٹ رہے ایک دلت طالب علم کا حالیہ قتل یوپی میں امن و امان کی خستہ حالی کی سب سے بھیانک مثال ہے۔ اتر پردیش کانگریس کے کارکنان بی جے پی کے نظام اور مجرموں کے اس اتحاد کے خلاف آج ہر ضلع اور ہر تحصیل میں احتجاج کر کے انصاف کے لیے آواز بلند کریں گے۔ اب وقت آگیا ہے کہ مودی میڈیا کی بنائی ہوئی جھوٹی تصویر سے باہر نکلیں اور سچ دیکھیں، ڈبل انجن والی حکومت ‘جنگل راج کی گارنٹی’ ہے۔

خیال رہے کہ رامپور کے سلائی بڑا گاؤں میں امبیڈکر کا مجسمہ نصب کرنے پر ہونے والے جھگڑے کے دوران ایک 17 سالہ دل طالب علم سمیش کمار کی گولی لگنے سے موت ہو گئی تھی۔ کانگریس پارٹی نے سمیش کمار کے قتل کی شدید الفاظ میں مذمت کرتے ہوئے واقعہ کی جانچ کرانے اور قصورواروں کے خلاف سخت کارروائی کا مطالبہ کیا تھا۔

رپورٹ کے مطابق جمعے کے دن اس معاملے پر کارروائی کرتے ہوئے یوپی حکومت نے معاملے میں متعلقہ ڈپٹی ڈسٹرکٹ مجسٹریٹ اور پولیس سرکل افسر سمیت چار افسران کے خلاف ایکشن لیا ہے۔ جبکہ واقعہ کے سلسلے میں ڈپٹی ڈسٹرکٹ مجسٹریٹ اور تحصیلدار سمیت 25 افراد کے خلاف ایف آئی آر درج کی گئی ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.