نئی دہلی: قومی راجدھانی سمیت پورا شمالی ہندوستان سردی کی زد میں ہے جس میں گھنی دھند، کم دکھنے کی وجہ سے ریل اور ہوائی ٹریفک میں خلل پڑ رہا ہے۔
ہندوستانی ریلوے کے مطابق اتوار کو ملک کے مختلف حصوں سے قومی دارالحکومت آنے والی تقریباً بارہ مسافر ٹرینیں مقررہ وقت سے پیچھے چل رہی تھیں۔ امرتسر-ناندیڑ ایکسپریس، پوری-نئی دہلی پورشوتم ایکسپریس، امبیڈکر نگر-کٹرا اور مانک پور-نظام الدین ایکسپریس سمیت دیگر ٹرینیں گھنی دھند کی وجہ سے تاخیر کا شکار ہوئیں۔
اسلامی ممالک آپسی ’سر پھٹول‘ میں مصروف!
دہلی کے ہوائی اڈے پر گھنی دھند کی وجہ سے لوگوں کو کئی گھنٹوں تک اپنی پروازوں کا انتظار کرتے دیکھا گیا۔ کچھ پروازوں کی منسوخی کا بھی اعلان کیا گیا۔ دہلی ہوائی اڈے کے حکام نے ایک ایڈوائزری جاری کرتے ہوئے مسافروں سے درخواست کی کہ وہ اپنی پروازوں کی حالت کے بارے میں متعلقہ ایئر لائنز سے رابطہ کریں۔
محکمہ موسمیات (آئی ایم ڈی) کے مطابق اتوار کی صبح 3:00 بجے سے دہلی-پالم پر حد نگاہ صفر میٹر پر رہی۔ آئی ایم ڈی نے کہا کہ دہلی، ہریانہ، پنجاب، راجستھان، اتر پردیش، مغربی مدھیہ پردیش اور بہار کے مختلف علاقوں میں بہت گھنی دھند دیکھی گئی۔
ملک کی معاشی راجدھانی ممبئی میں پولیس کی زبردست قلت
آئی ایم ڈی نے 21-22 جنوری کے دوران بہار اور شمالی مدھیہ پردیش میں سردی کی لہر کے حالات اور شمالی ہندوستان کے مزید حصوں میں سردی کی لہر میں اضافے کی پیش گوئی کی ہے۔ قومی راجدھانی میں آج صبح دھند چھائی ہوئی تھی اور کم سے کم درجہ حرارت 4.8 ڈگری سیلسیس ریکارڈ کیا گیا جو معمول سے تین ڈگری کم ہے۔
