وزیر اعلیٰ سورین نے موجودہ قومی صورتحال کے پیش نظر تبادلہ خیال کرتے ہوئے عہدیداروں کو کئی اہم ہدایات دیں
جدید بھارت نیوز سروس
رانچی،10 مئیـ۔ وزیر اعلیٰ ہیمنت سورین نے آج اتوار کے روز رانچی کے کانکے روڈ پر واقع وزیر اعلیٰ کے رہائشی دفتر میں سینئر انتظامی اور پولیس افسران کے ساتھ ایک اعلیٰ سطحی میٹنگ کی جس میں موجودہ قومی صورتحال اور منظر نامے کے پیش نظر ریاست کے سیکورٹی انتظامات پر غور کیا گیا۔ میٹنگ میں وزیر اعلیٰ ہیمنت سورین نے کہا کہ قومی سلامتی اولین ترجیحات میں سے ایک ہے۔ ملک بھر میں سیکورٹی کی صورتحال کو دیکھتے ہوئے جھارکھنڈ میں ہر شہری کی حفاظت کو یقینی بنایا جانا چاہئے۔ چیف منسٹر نے افسران سے کہا کہ وہ ضروری سول خدمات کو مضبوط بنانے پر خصوصی توجہ دیں اور ایک بہتر ایکشن پلان بنا کر ریاست کے لوگوں کی حفاظت سے متعلق تمام قسم کے احتیاطی اقدامات کو فوری طور پر اٹھائے جائیں۔ انہوں نے عہدیداروں سے کہا کہ وہ اس بات کو یقینی بنائیں کہ ریاست میں عام لوگوں میں خوف و ہراس کی صورتحال پیدا نہ ہو۔ چیف منسٹر نے عہدیداروں کو ہر قیمت پر افواہوں کو روکنے کی ہدایت دی۔ جھوٹے اور گمراہ کن پیغامات بھیج کر ماحول کو خراب کرنے والے سماج دشمن عناصر کے خلاف سخت کارروائی کی جائے۔ ملک دشمن سرگرمیوں میں ملوث افراد اور سوشل سائٹس پر غلط پیغامات شیئر کرنے والوں کی نشاندہی کرکے ان کے خلاف قانونی کارروائی کی جائے۔ چیف منسٹر نے عہدیداروں کو ہدایت دی کہ وہ ریاست میں شہری دفاع کے رضاکاروں کو فعال کریں اور ضرورت کے مطابق شہری دفاع کے رضاکاروں کی تعداد میں اضافہ کریں۔ سول ڈیفنس کے شعبے میں کام کرنے والے اداروں کے ساتھ کوآرڈینیشن قائم کرکے سیکیورٹی کے بہتر انتظامات کے لیے ایکشن پلان تیار کریں۔ انہوں نے کہا کہ سول ڈیفنس کے رضاکاروں کو فوری ریلیف، ریسکیو کام، عوامی آگاہی اور کمیونٹی کی استعداد کار بڑھانے جیسے موضوعات پر خصوصی تربیت دی جانی چاہیے۔ چیف منسٹر نے عہدیداروں کو ہدایت دی کہ وہ ریاستی سطح کے کنٹرول روم کے ساتھ ساتھ ضلع سطح کے کنٹرول روم کو بھی فعال کریں۔
انہوں نے عہدیداروں سے کہا کہ وہ ریاست کے اندر تمام بڑے اور چھوٹے PSUs (Public Sector Undertakings) کے لئے جامع حفاظتی انتظامات کریں۔ چیف منسٹر نے عہدیداروں کو ہدایت دی کہ وہ تمام اسپتالوں کی چھتوں پر میڈیکل سائن بورڈ نصب کریں۔
