اسپیکر کی کرسی کی جانب کاغذ پھینکنے پر اپوزیشن کے آٹھ ارکان پارلیمنٹ معطل
نئی دہلی، 3 فروری:۔ (ایجنسی) لوک سبھا میں حزبِ اختلاف کے قائد راہل گاندھی کے خطاب کے دوران اپوزیشن اراکین کی جانب سے شدید ہنگامہ آرائی کے معاملے میں اسپیکر اوم برلا نے سخت قدم اٹھاتے ہوئے اپوزیشن کے آٹھ اراکینِ پارلیمنٹ کو موجودہ بجٹ اجلاس کے بقیہ حصے کے لیے معطل کر دیا ہے۔ معطل شدہ اراکین اب اس اجلاس کی کسی بھی کارروائی میں حصہ نہیں لے سکیں گے۔
کن اراکین کو کیا گیا معطل
معطل کیے گئے اراکین میں کانگریس کے امرندر سنگھ راجہ وارنگ، گرجیت سنگھ اوجلا، ہیبی ایڈن، منیکم ٹیگور، پرشانت یادوراؤ پاڈولے، سی کرن کمار ریڈی، ڈین کوریاکوس اور سی پی آئی (ایم) کے رکن ایس وینکٹیشن شامل ہیں۔ ان پر ایوان میں کاغذات اچھالنے اور اسپیکر کی کرسی کی توہین کا الزام عائد کیا گیا ہے۔
راہل گاندھی کے خطاب پر ہنگامہ
واضح رہے کہ سوموار کے بعد منگل کو بھی پارلیمنٹ کی کارروائی معمول کے مطابق نہیں چل سکی۔ دوپہر دو بجے ایوان کی کارروائی شروع ہوتے ہی راہل گاندھی نے خطاب شروع کیا، جس میں انہوں نے چین اور ہندوستان-امریکہ تجارتی معاہدے کا معاملہ اٹھایا۔ اسپیکر نے بار بار انہیں صدرِ جمہوریہ کے خطاب پر پیش کی گئی شکریہ کی تحریک پر گفتگو تک محدود رہنے کی ہدایت دی، تاہم راہل گاندھی مسلسل چین کے موضوع پر بات کرتے رہے، جس کے بعد اسپیکر نے انہیں بولنے سے روک دیا۔
ایوان میں ہنگامہ اور کارروائی کی معطلی
راہل گاندھی کو بولنے سے روکے جانے کے بعد اپوزیشن اراکین نے شدید احتجاج شروع کر دیا۔ ہنگامے کے دوران بعض اراکین ایوان کے ٹیبل پر چڑھ گئے جبکہ کچھ نے اسپیکر کی کرسی کی جانب کاغذات اچھالے۔ صورتحال کو دیکھتے ہوئے لوک سبھا کی کارروائی پہلے سہ پہر تین بجے تک اور بعد ازاں دن بھر کے لیے ملتوی کر دی گئی۔
معطلی کی تحریک اور منظوری
دوپہر تین بجے جب کارروائی دوبارہ شروع ہوئی تو چیئرمین دلیپ سائکیا نے ہنگامہ کرنے والے آٹھ اراکین کے نام لیے۔ پارلیمانی امور کے وزیر کرن رجیجو نے قاعدہ 374 (2) کے تحت ان اراکین کو موجودہ اجلاس کی باقی مدت کے لیے معطل کرنے کی تحریک پیش کی، جسے ایوان نے صوتی ووٹ سے منظور کر لیا۔
راہل گاندھی کے الزامات
ایوان میں بولنے کی اجازت نہ ملنے کے بعد راہل گاندھی نے پارلیمنٹ کے باہر نامہ نگاروں سے بات کرتے ہوئے دعویٰ کیا کہ وزیر اعظم نریندر مودی پر دباؤ ڈال کر امریکہ کے ساتھ تجارتی معاہدہ کروایا گیا ہے۔ انہوں نے الزام لگایا کہ اس معاہدے کے ذریعے ملک کو فروخت کر دیا گیا ہے اور وزیر اعظم اپنی شبیہ کے بے نقاب ہونے سے خوفزدہ ہیں۔ ادھر اپوزیشن کے آٹھ اراکین کی معطلی اور ہندوستان-امریکہ تجارتی معاہدے کے خلاف راہل گاندھی، پرینکا گاندھی واڈرا اور دیگر اپوزیشن اراکین نے پارلیمنٹ کے مکر دوار پر احتجاج بھی کیا اور حکومت کے خلاف نعرے بازی کی۔
