صنعت کاروں کو ملے گا خصوصی اقتصادی پیکیج:نتیش کمار
جدید بھارت نیوز سروس
پٹنہ، 10 مارچ: بہار کے وزیر اعلیٰ نتیش کمار نے منگل کو کہا کہ ریاست میں صنعتیں لگانے کے لیے صنعت کاروں کو خصوصی اقتصادی پیکیج دیا جا رہا ہے، جس سے انہیں کافی مدد ملے گی۔ وزیر اعلیٰ کمار نے آج ‘سمردھی یاترا ‘ کے دوران سپول ضلع کے نرملی سب ڈویژنل آفس گراؤنڈ میں منعقدہ پروگرام میں ضلع کے ترقیاتی کاموں کا جائزہ لیا۔ انہوں نے جائزہ میٹنگ میں کہا کہ ریاستی حکومت نے اگلے پانچ سالوں میں ایک کروڑ نوجوانوں کو نوکری اور روزگار دینے کا ہدف رکھا ہے۔ انہوں نے کہا کہ ریاست میں صنعتیں لگانے اور سیلف ایمپلائمنٹ (خود روزگار) کرنے والوں کو کئی طرح کی سہولیات فراہم کر کے حکومت ان کی حوصلہ افزائی کر رہی ہے۔ انہوں نے بتایا کہ بہار میں صنعتیں لگانے کے لیے صنعت کاروں کو خصوصی اقتصادی پیکیج دیا جا رہا ہے، جس سے ریاست میں صنعتیں لگانے والے صنعت کاروں کو کافی مدد ملے گی۔نتیش کمار نے کہا کہ صنعتیں لگانے کے لیے تمام اضلاع میں سہولیات فراہم کی جا رہی ہیں۔ انہوں نے کہا کہ ریاستی حکومت کا مقصد ہے کہ بہار میں صنعتوں کو مزید فروغ ملے، بہار کے نوجوان ہنرمند اور خود کفیل بنیں اور انہیں زیادہ سے زیادہ روزگار ملے جس سے ان کا مستقبل محفوظ ہو۔ وزیر اعلیٰ نے کہا کہ 20 نومبر 2025 کو ریاست میں نئی حکومت کی تشکیل کے چند ہی دنوں بعد ریاست کو ملک کی سب سے زیادہ ترقی یافتہ ریاستوں کے زمرے میں شامل کرنے کے لیے ‘سات نشچے-3’ کے پروگراموں کو نافذ کیا گیا ہے۔سی ایم نتیش نے کہا کہ ‘سات نشچے-3’ کے اہم مقاصد میں سے ایک مقصد ‘مضبوط بنیاد، جدید توسیع ‘ ہے۔ اس کے تحت ریاست میں شہری علاقوں کی توسیع اور شہری سہولیات کو مضبوط بنایا جا رہا ہے۔ ساتھ ہی ریاست میں نئے جدید منصوبہ بند شہروں کو تیار کیا جا رہا ہے۔ شہروں میں آسان رسائی کے لیے پانچ نئی ایکسپریس وے سڑکوں کی تعمیر اور دیہی سڑکوں کو مرحلہ وار طریقے سے 2 لین تک چوڑا کرنے کا عمل شروع کیا جا رہا ہے۔ اس کے علاوہ بجلی سے متعلق بنیادی ڈھانچے کی مضبوطی اور تمام خواہشمند افراد کے گھروں کی چھتوں پر سولر پینل لگا کر شمسی توانائی کے استعمال کو فروغ دیا جا رہا ہے۔
