حاجی پور(راست) :انٹرمیڈیٹ سالانہ امتحان 2026 کے کامیاب، پرامن اور نقل سے پاک انعقاد کو یقینی بنانے کے مقصد سے ضلع مجسٹریٹ محترمہ ورشا سنگھ اور پولیس سپرنٹنڈنٹ جناب وکرم سیہاگ نے کلکٹریٹ کے کانفرنس ہال میں مشترکہ بریفنگ کی۔ اس موقع پر انٹر امتحان میں تعینات تمام مجسٹریٹس، پولیس افسران، سنٹر سپرنٹنڈنٹس اور متعلقہ افسران موجود تھے۔ ضلع مجسٹریٹ محترمہ ورشا سنگھ نے واضح الفاظ میں کہا کہ امتحان کی شفافیت کو برقرار رکھنا انتظامیہ کی اولین ترجیح ہے۔ امتحانی ڈیوٹی میں تعینات تمام مجسٹریٹس اور پولیس افسران اپنی ذمہ داریوں کو پوری ایمانداری، مستعدی اور چوکسی کے ساتھ انجام دیں۔ کسی بھی سطح پر لاپروائی، غفلت یا قواعد کی خلاف ورزی پائے جانے پر متعلقہ افسر کے خلاف سخت کارروائی کی جائے گی۔ انہوں نے ہدایت دی کہ امتحانی مراکز پر تین سطحی سخت تلاشی کا انتظام یقینی بنایا جائے تاکہ کسی بھی قسم کی بے ضابطگی کا امکان ختم ہو سکے۔ضلع مجسٹریٹ نے مزید کہا کہ تعینات مجسٹریٹس، پولیس افسران، سنٹر سپرنٹنڈنٹس اور انویجلیٹرز کسی بھی صورت میں موبائل فون امتحانی مرکز کے اندر نہیں لے جائیں گے۔ امتحانی مراکز پر کام کرنے والے تمام اہلکار شناختی کارڈ (آئی کارڈ) کے ساتھ ہی ڈیوٹی انجام دیں گے۔
تمام سنٹر سپرنٹنڈنٹس، مجسٹریٹس اور پولیس فورس کو مقررہ وقت پر اپنی اپنی تعیناتی کی جگہ پر پہنچنا لازمی ہوگا۔پولیس سپرنٹنڈنٹ جناب وکرم سیہاگ نے کہا کہ امتحان کے دوران امن و امان برقرار رکھنے کے لیے پولیس انتظامیہ پوری طرح چوکس رہے گی۔ ہر امتحانی مرکز پر مناسب تعداد میں پولیس فورس تعینات کی گئی ہے۔ امتحانی مراکز کے اطراف سماج دشمن عناصر پر کڑی نظر رکھی جائے گی اور کسی بھی قسم کی گڑبڑی کی اطلاع ملنے پر فوری کارروائی کی جائے گی۔ انہوں نے کہا کہ امتحانی مراکز کے 500 گز کے دائرے میں دفعہ 144 نافذ رہے گی تاکہ امتحان پُرامن ماحول میں منعقد ہو سکے۔ بریفنگ کے دوران محکمہ تعلیم کے افسر نے بتایا کہ انٹرمیڈیٹ سالانہ امتحان 2026 کا انعقاد 2 فروری سے 13 فروری 2026 تک دو شفٹوں میں کیا جائے گا۔ ضلع میں مجموعی طور پر 68 امتحانی مراکز قائم کیے گئے ہیں، جن میں حاجی پور سب ڈویژن میں 50، مہوا سب ڈویژن میں 14 اور مہنار سب ڈویژن میں 4 امتحانی مراکز شامل ہیں۔ امن و امان اور پُرامن امتحان کے انعقاد کے لیے ہر مرکز پر اسٹیٹک اور زونل مجسٹریٹس، پولیس افسران اور پولیس فورس تعینات کی گئی ہے۔ تمام تعینات مجسٹریٹس اور پولیس افسران کو صبح 7:30 بجے تک جبکہ سنٹر سپرنٹنڈنٹس اور انویجلیٹرز کو صبح 7:00 بجے تک امتحانی مرکز پر پہنچنے کی ہدایت دی گئی ہے۔ امتحان دینے والے طلبہ کے لیے جوتے اور موزے پہن کر امتحانی مرکز میں داخلہ ممنوع ہوگا۔ مکمل تلاشی کے بعد ہی امتحانی مرکز میں داخلے کی اجازت دی جائے گی۔ انٹر امتحان کے بہتر انعقاد اور شکایات کے ازالے کے لیے کلکٹریٹ کے کانفرنس ہال میں ضلعی کنٹرول روم قائم کیا گیا ہے، جس کا ٹیلی فون نمبر 06224-260220 ہے۔
امتحانات کی شفافیت پر کوئی سمجھوتہ نہیں کیا جائے گا: ڈی ایم
