راجیہ سبھا انتخابات: نتیش کمار اور نتن نبین سمیت این ڈی اے کے

تمام 5 امیدواروں نے کاغذاتِ نامزدگی داخل کر دیے

جدید بھارت نیوز سروس
پٹنہ، 5 مارچ: بی جے پی کے قومی صدر نتن نبین، بہار کے وزیر اعلیٰ نتیش کمار سمیت قومی جمہوری اتحاد (این ڈی اے) کے تمام پانچ امیدواروں نے آج راجیہ سبھا انتخاب کے لیے اپنے کاغذاتِ نامزدگی داخل کر دیے۔ اس موقع پر مرکزی وزیر داخلہ امت شاہ، بی جے پی کے ریاستی صدر سنجے سراوگی، بہار کے نائب وزرائے اعلیٰ سمراٹ چودھری اور وجے سنہا سمیت این ڈی اے کے کئی اہم رہنما موجود تھے۔نامزدگی سے قبل بی جے پی کے قومی صدر نتن نبین نے پٹنہ کے مختلف مندروں میں جا کر پوجا ارچنا کی اور آشیرواد لیا۔ وہ آج صبح پٹنہ کے بانس گھاٹ واقع کالی مندر اور گول گھر واقع ماں اکھنڈ واسنی مندر پہنچے اور باقاعدہ پوجا کر کے آشیرواد حاصل کیا۔ اس کے بعد انہوں نے مہاویر مندر میں بھی پوجا کی اور ہنومان جی اور بھگوان شنکر کا آشیرواد لیا۔
مندر میں پوجا کے بعد میڈیا سے بات کرتے ہوئے نتن نبین نے کہا، “بھگوان زندگی کے ہر لمحے میں آپ کے ساتھ ہوتے ہیں۔ میں مانتا ہوں کہ مہاویر ہنومان مندر کا میری زندگی میں ایک خاص مقام ہے۔ آج میرے لیے ایک نئی شروعات ہے۔ بھارتیہ جنتا پارٹی کے فیصلے کے ساتھ ہم لوگ کام کرتے ہیں۔” انہوں نے مزید کہا، “آج میں نے کالی مندر اور مہاویر مندر میں درشن کیے۔ میں نے دعا کی ہے کہ بھگوان مجھے اتنی طاقت دے کہ جس جذبے کے ساتھ اب تک کا سفر رہا ہے، اسی جذبے کے ساتھ آگے بڑھ سکوں۔”بہار سے اپنے تعلق کے حوالے سے انہوں نے کہا، “بہار میری زندگی میں ایک الگ مقام رکھتا ہے، میرا علاقہ میری زندگی میں سب کچھ ہے۔ حقیقت یہ ہے کہ انسان اپنی جڑوں کو چھوڑ کر کبھی بڑا نہیں ہوتا۔ جب آپ کی جڑ مضبوط ہوگی تبھی آپ کا ‘وٹ ورکش ‘ (برگد کا درخت) بڑا ہوگا۔” بی جے پی صدر نے مزید کہا، “میں مانتا ہوں کہ بہار میری زمین ہے۔ اس زمین کو سینچتے رہنا اور اسے ہمیشہ زرخیز بنائے رکھنا میری روح میں بسا ہوا ہے۔ میرا ماننا ہے کہ زندگی کے ہر لمحے میں، میں جہاں بھی رہوں، میرا علاقہ اور میرا بہار ہمیشہ میرے ساتھ رہے۔”