چوتھی بار پارٹی کی کمان سنبھالی
جدید بھارت نیوز سروس
پٹنہ، 24 مارچ:بہار کے وزیر اعلیٰ نتیش کمار ایک بار پھر بلامقابلہ جنتا دل (یونائیٹڈ) کے قومی صدر منتخب کر لیے گئے ہیں۔ منگل کے روز پارٹی کی جانب سے اس کا باضابطہ اعلان کیا گیا۔ دہلی میں واقع پارٹی ہیڈکوارٹر میں دوپہر 2:30 بجے ایک پریس کانفرنس کے دوران انہیں انتخاب کا سرٹیفکیٹ سونپا جائے گا۔ریٹرننگ آفیسر اور سابق راجیہ سبھا ممبر انیل پرساد ہیگے نے معلومات فراہم کرتے ہوئے بتایا کہ نامزدگی واپس لینے کی آخری مدت ختم ہونے کے بعد صرف نتیش کمار کی ہی نامزدگی درست پائی گئی۔ آج دوپہر انہیں سرکاری طور پر منتخب قرار دے کر سرٹیفکیٹ دیا جائے گا۔ اس موقع پر پارٹی کے کارگزار صدر سنجے کمار جھا، مرکزی وزیر لالن سنگھ اور بہار حکومت کے وزیر شرون کمار سمیت کئی سینئر قائدین موجود رہیں گے۔نتیش کمار مسلسل چوتھی بار قومی سطح پر پارٹی کی قیادت کرنے جا رہے ہیں۔ حال ہی میں راجیہ سبھا کے لیے منتخب ہونے کے بعد وہ فی الحال دہلی میں ہی مقیم ہیں۔ جے ڈی یو کے کارگزار صدر سنجے کمار جھا نے بتایا کہ پارٹی کے تمام اراکین نے اجتماعی طور پر نتیش کمار سے قیادت سنبھالنے کی درخواست کی تھی۔ راجیہ سبھا ممبر رام ناتھ ٹھاکر نے کہا کہ نتیش کمار ہمارے سرپرست ہیں اور تمام کارکنوں کی خواہش تھی کہ وہی کمان سنبھالیں تاکہ بہار کی ترقی اور پارٹی کی مضبوطی برقرار رہے۔دوسری جانب، حال ہی میں راجیہ سبھا سیٹ کی تقسیم کے حوالے سے ذاتی اختلافات کی خبروں کے درمیان سینئر لیڈر کے سی تیاگی نے واضح کیا ہے کہ ان کے اور نتیش کمار کے درمیان کوئی تلخی نہیں ہے اور ان کے تعلقات پہلے کی طرح ہی خوشگوار اور مضبوط ہیں۔
