جوڑنے والی 542 کروڑ کی سرنگ کا سنگ بنیاد رکھا
جدید بھارت نیوز سروس
پٹنہ، 8 مارچ: بہار کے وزیر اعلیٰ نتیش کمار نے اتوار کے روز 542 کروڑ روپے کی لاگت سے بہار میوزیم اور پٹنہ میوزیم کو جوڑنے والی سرنگ کے سنگ بنیاد کی تختی کی نقاب کشائی کر کے کام کا آغاز کیا۔ وزیر اعلیٰ نتیش کمار نے تعمیراتی مشین کا بٹن دبا کر کام شروع کرایا۔ اس دوران افسران نے وزیر اعلیٰ نتیش کمار کو ٹنل (سرنگ) کے تعمیراتی کام کے طریقہ کار اور اسے مکمل کرنے کے سلسلے میں تفصیلی معلومات فراہم کیں۔وزیر اعلیٰ نتیش کمار نے نہرو پتھ کے قریب ہڑتالی موڑ پر واقع زیر تعمیر میوزیم سب وے ٹنل کے کام کے آغاز کے دوران افسران کو ہدایات دیتے ہوئے کہا کہ تعمیراتی کام کو بہتر طریقے سے جلد مکمل کیا جائے، اس کا خاص خیال رکھیں۔ انہوں نے کہا کہ اس کے بن جانے سے لوگ بہار میوزیم اور پٹنہ میوزیم میں رکھے گئے فن پاروں کا ایک جگہ سے دوسری جگہ جا کر آسانی سے مشاہدہ کر سکیں گے۔ سیاحوں کی تعداد میں کافی اضافہ ہوگا، اس بات کو مدنظر رکھتے ہوئے پارکنگ اور دیگر ضروری سہولیات کا بھی مناسب انتظام یقینی بنائیں۔ انہوں نے کہا کہ ٹنل کی تعمیر اس طرح کرائیں جس سے نہرو پتھ پر آمد و رفت میں کسی قسم کی دشواری نہ ہو۔ وزیر اعلیٰ نتیش کمار نے اس کے بعد بہار میوزیم کا دورہ کیا۔ اس دوران بہار میوزیم کے ڈائریکٹر جنرل انجنی کمار سنگھ نے میوزیم کے احاطے میں لگائے گئے نئے فن پاروں، سیاحوں کی تعداد، پارکنگ کے انتظام اور میوزیم کمپلیکس میں دستیاب سہولیات وغیرہ کے بارے میں وزیر اعلیٰ کو تفصیلی معلومات دیں۔ دورے کے دوران وزیر اعلیٰ نے افسران کو ضروری ہدایات دیں۔بہار میوزیم کے سامنے دوبارہ تیار کیے جا رہے 60 رہائش گاہوں اور آفیسرز ہوسٹل کیمپس کے ساتھ ساتھ پارک کے تعمیراتی کام کے بارے میں معلومات حاصل کیں اور سائٹ کا معائنہ کیا۔ سائٹ پلان کے ذریعے افسران نے وزیر اعلیٰ نتیش کمار کو بتایا کہ یہاں کثیر المنزلہ عمارت تعمیر کی جانی ہے۔ یہاں تعمیر ہونے والی عمارت کے نئے احاطے میں سولر پارکنگ شیڈ، اوپن پارکنگ اور کلب ہاؤس کا انتظام یقینی بنایا جائے گا۔ یہاں پارکنگ کا کافی انتظام رہے گا۔ معائنے کے دوران وزیر اعلیٰ نے افسران کو ہدایات دیتے ہوئے کہا کہ اس کام کو تیزی سے آگے بڑھائیں۔ انہوں نے کہا کہ ان کے ذہن میں پہلے سے ہی یہ خواہش تھی کہ پرانے ڈھانچے کو توڑ کر کثیر المنزلہ عمارت بنے جو ہر قسم کی ضروری سہولیات سے لیس ہو۔ انہوں نے کہا کہ نہرو پتھ کے کنارے اس کثیر المنزلہ عمارت کے بن جانے سے رہائش کا بہتر انتظام دستیاب ہوگا۔ اس کے بغل میں بہتر طریقے سے پارک کی تعمیر کرائیں، تاکہ میوزیم آنے والے لوگ اس سے بھی لطف اندوز ہو سکیں۔ وزیر اعلیٰ نتیش کمار نے بہار میوزیم اور پٹنہ میوزیم کو جوڑنے والی سرنگ کے پٹنہ میوزیم والے سرے کا بھی معائنہ کیا اور افسران کو ضروری ہدایات دیں۔
