بی جے پی کمٹمنٹ والی پارٹی ہے، جو کہہ دیا اس سے پیچھے نہیں ہٹتی: سمراٹ چودھری
جدید بھارت نیوز سروس
پٹنہ،6 اپریل :دنیا کی سب سے بڑی سیاسی پارٹی بھارتیہ جنتا پارٹی نے آج ملک بھر کے ساتھ ساتھ بہار میں بھی اپنا 47 واں یومِ تاسیس روایتی جوش و خروش اور دھوم دھام سے منایا۔ اس تاریخی موقع پر پٹنہ میں واقع پارٹی کے ریاستی دفتر کو پھولوں اور رنگین برقی قمقموں سے دلہن کی طرح سجایا گیا تھا جہاں کارکنوں کا جوش و خروش دیدنی تھا۔ پروگرام کا باقاعدہ آغاز پرچم کشائی سے ہوا جس کے بعد پارٹی کے عظیم بانی رہنماؤں کی خدمات اور ان کے سنہری دور کے واقعات کو یاد کیا گیا۔ ریاستی صدر سنجے سراوگی نے پارٹی کا پرچم لہرایا اور آر ایس ایس کے مفکر پنڈت دین دیال اپادھیائے اور بھارتیہ جن سنگھ کے بانی ڈاکٹر شیاما پرساد مکھرجی کے مجسموں پر گلباری کر کے انہیں بھرپور خراجِ عقیدت پیش کیا۔ اس تقریب میں نائب وزیراعلیٰ سمراٹ چودھری، تنظیم کے جنرل سکریٹری بھیکو بھائی دلسانیا، رکن پارلیمنٹ روی شنکر پرساد اور سنجیو چورسیا سمیت کئی اہم رہنما موجود رہے۔جشن کی مناسبت سے پارٹی دفتر میں 47 کلو مٹھائی تقسیم کی گئی اور 47 چراغ روشن کیے گئے جبکہ کارکنوں نے ڈھول کی تھاپ پر رقص کیا اور زبردست آتش بازی کے ذریعے اپنی خوشی کا اظہار کیا۔ ریاستی صدر سنجے سراوگی نے تمام کارکنوں کو مبارکباد دیتے ہوئے کہا کہ بی جے پی محض ایک سیاسی جماعت نہیں بلکہ ایک مقدس نظریہ ہے جس کی جڑوں میں لاکھوں کارکنوں کا خون پسینہ شامل ہے۔ انہوں نے وزیراعظم نریندر مودی کے خطاب کا حوالہ دیتے ہوئے واضح کیا کہ بی جے پی ‘سب کا ساتھ، سب کا ترقی، سب کا وشواس اور سب کا پریاس ‘ کے اصول پر سختی سے عمل پیرا ہے اور آج یہ جماعت ملک میں ترقی، نئے خیالات اور عوامی اعتماد کا دوسرا نام بن چکی ہے۔ انہوں نے سابق وزیراعظم اٹل بہاری واجپئی کے مشہور الفاظ کو دہرایا کہ اندھیرا چھٹے گا، سورج نکلے گا اور کمل کھلے گا، جس کی عملی تصویر آج پورا ملک دیکھ رہا ہے۔نائب وزیراعلیٰ سمراٹ چودھری نے اپنے خطاب میں پارٹی کی ثابت قدمی کی تعریف کی اور کہا کہ بی جے پی جس مقصد کے لیے کمٹمنٹ کر لیتی ہے اس سے کبھی پیچھے نہیں ہٹتی۔ انہوں نے انتودیا یعنی آخری صف میں کھڑے انسان کی فلاح و بہبود کے مشن پر زور دیا اور کہا کہ وزیراعظم مودی کی قیادت میں بھارت مسلسل مضبوط ہو رہا ہے۔ اس موقع پر پارٹی کے پرانے اور سینئر کارکنوں کو ان کی طویل خدمات کے اعتراف میں اعزاز سے نوازا گیا جس سے نئے کارکنوں میں تحریک پیدا ہوئی۔ تقریب کی ایک خاص بات یہ تھی کہ غیر سیاسی خاندانوں سے تعلق رکھنے والے بڑی تعداد میں نوجوانوں نے بی جے پی کی رکنیت اختیار کی جنہیں ریاستی صدر نے پارٹی میں خوش آمدید کہا۔ سنجے سراوگی نے آخر میں تمام کارکنوں سے یہ عہد لیا کہ وہ تب تک دم نہیں لیں گے جب تک 2047 تک بھارت کو ایک ترقی یافتہ ملک بنانے کا وزیراعظم کا خواب شرمندہ تعبیر نہیں ہو جاتا۔
