اے اے آئی نے شمالی اور مغربی علاقوں کے 32 ہوائی اڈوں پرشہری پروازوں کا آپریشن عارضی طور پر معطل کیا

نئی دہلی، 10 مئی (ہ س) : ہندوستان اور پاکستان کے درمیان جاری کشیدگی کے پیش نظر ائیرپورٹس اتھارٹی آف انڈیا (اے اے آئی) نے شمالی اور مغربی علاقوں کے 32 ہوائی اڈوں پر سول فلائٹ آپریشن کو عارضی طور پر معطل کر دیا ہے۔ اس کے علاوہ، نئی دہلی اور ممبئی فلائٹ انفارمیشن ریجنز (ایف آئی آر) کے اندر ایئر ٹریفک سروس (اے ٹی ایس) روٹس کے 25 حصوں کے عارضی طور پر بند رہنے کی مدت میں توسیع کر دی گئی ہے۔ شہری ہوا بازی کی وزارت نے ہفتے کے روز ایک بیان میں کہا کہ اے اے آئی نے شمالی اور مغربی علاقوں کے 32 ہوائی اڈوں پر شہری پروازوں کے آپریشن کو عارضی طور پر معطل کر دیا ہے۔ ان ہوائی اڈوں پر تمام سول پروازیں آپریشنل وجوہات کی بنا پر 9 سے 14 مئی 2025 تک (15 مئی 2025 کو 0529 آئی ایس ٹی کے مطابق)معطل رہیں گی ۔ اس کے علاوہ، اے اے آئی نے دہلی اور ممبئی فلائٹ انفارمیشن ریجن کے اندر ہوائی ٹریفک سروس روٹس کے 25 حصوں کو عارضی طور پر بند کر دیا ہے۔ یہ 25 روٹ سیکشنز زمینی سطح سے لامحدود اونچائی تک دستیاب نہیں ہوں گے۔ ملک کے جن 32 ہوائی اڈوں کو تمام قسم کے شہری پروازوں کے لیے عارضی طور پر بند کر دیا گیا ہے، ان میں ادھم پور، امبالہ، امرتسر، اونتی پور، بھٹنڈہ، بھج، بیکانیر، چنڈی گڑھ، ہلوارہ، ہنڈن، جیسلمیر، جموں، جام نگر، جودھپور، کانڈلا، کانگڑا، کیشود،کشن گڑھ، کلو -منالی، لیہ ، لدھیانہ ، مندرا، نلیہ ، پٹھان کوٹ، پٹیالہ، پوربندر، راجکوٹ، سرساوا، شملہ، سری نگر، تھوائس اور اترلائی شامل ہیں۔ وزارت نے کہا کہ ان ہوائی اڈوں پر تمام سول فلائٹ آپریشن اس مدت کے دوران معطل رہیں گے۔ ساتھ ہی، ایئر لائنز اور فلائٹ آپریٹرز کو مشورہ دیا گیا ہے کہ وہ موجودہ ایئر ٹریفک ایڈوائزری کے مطابق متبادل روٹنگ کی منصوبہ بندی کریں۔ نیز، حفاظت کو یقینی بنانے اور خلل کو کم سے کم کرنے کے لیے متعلقہ اے ٹی سی یونٹوں کے ساتھ مل کر عارضی بندش کا انتظام کیا جا رہا ہے۔