جديد بهارت

Jadeed Bharat

No. 1 Urdu Daily Newspaper of Jharkhand

E Paper


رانچی پولس نے 15گھنٹے میں پانچ زانیوں کو دھردبوچا

19 Mar 2019


جدید بھارت نیوز سروس

رانچی، 19 ؍مارچ: ریاست کی راجدھانی رانچی میں سوموار کی دیر رات ایک طالبہ کی اجتماعی آبروریزی کرنے کا معاملہ سامنے آنے کے بعد پولیس نے رات بھر چھاپے ماری کر پانچ نوجوانوں کو حراست میں لے لیا ہے اور ان سے پوچھ گچھ کی جا رہی ہے۔ وہیں بے ہوش متاثرہ کے پوری طرح سے ہوش میں آنے کا انتظار کیا گیا، تاکہ ملزمان کے بارے میں صحیح جانکاری مل سکے۔ واقعہ کے سلسلے میں ملی اطلاع کے مطابق رانچی کے لالپور تھانہ علاقہ کے ورددھمان کمپاؤنڈ کے ایک فلیٹ میں سوموار کی دیر رات کو طالبہ کو نشہ آور اشیاء کھلا کر اس کے دوست نے ہی آبروریزی کی اور اس کے دوست کے ساتھ آئے دیگر لڑکوں نے بھی اجتماعی آبروریزی کی۔ بعد میں متاثرہ کو نشے کی حالت میں سڑک پر لا کر چھوڑ دیا گیا۔ بتایا گیا ہے کہ طالبہ اور اس کے چھ دوست کل شام گھومنے نکلے تھے۔ اسی دوران طالبہ کے ایک دوست نے اس کو کولڈڈرنک پینے کے لئے دیا۔کولڈ ڈرنک پلا کر نوجوان نے اپنے دوستوں کے ساتھ اجتماعی آبروریزی کی۔لالپور تھانہ علاقہ میں پولیس کی گشت ٹیم نے فوری طور پر بے ہوش پڑی طالبہ کو اسپتال میں داخل کرایا۔ بتایا گیا ہے کہ طالبہ اتنے نشے میں تھی کہ وہ کچھ بھی بتا نہیں پا رہی تھی۔ آناً فاناً میں اس کو لالپور پولیس ٹیم نے مقامی نجی ہسپتال میں داخل کروایا اور بے ہوش حالت میں ہی طالبہ کی جانب سے ملی کچھ جانکاری کی بنیاد پر پولیس نے چھاپہ ماری شروع کی۔ پولیس نے فوری طور پر ان ملزمان کو حراست میں لے لیا، جن جن ملزمان کے نام متاثرہ نے بتائے تھے۔ بتایا گیا ہے کہ پانچ نوجوانوں کو پولیس نے حراست میں لے لیا ہے اور ان سے پوچھ گچھ کی جا رہی ہے۔ پولیس ایک اور ملزم کی تلاش میں بھی مصروف ہے۔ وہیں اسپتال میں داخل متاثرہ نے وہاں پہنچے اپنے والد کو پورے واقعہ کی جانکاری دی۔ اس نے والد کو بتایا کہ اس کے دوستوں نے اس کے ساتھ غلط کیا۔ فی الحال سبھی ملزمان سے پولس پوچھ گچھ کر رہی ہے۔